اسلام آباد: پی ٹی آئی رہنماؤں اور کارکنوں کیخلاف ایف آئی آر درج

اسلام آباد(این این آئی)پاکستان تحریک انصاف (پی ٹی آئی) کے رہنماؤں اور کارکنوں کے خلاف اسلام آباد کے تھانہ نون میں ایف آئی آر درج کر لی گئی۔ دہشت گردی اور اقدام قتل سمیت11دفعات کے تحت مقدمہ درج کیا گیا جس میں شعیب شاہین، عامر مغل سمیت70سے زائد رہنماؤں اور کارکنوں کو نامزد کیا گیا ہے۔ایف آئی آر کے متن مطابق ملزمان نے 26 نمبر چونگی کے قریب پولیس پر حملہ کیا، ڈنڈوں، پتھروںاور راڈز سے پولیس اہلکاروں کو زخمی کیا گیا۔مقدمے میں کہا گیا ہے کہ سرکاری گاڑی کے شیشے توڑے گئے اور پولیس اہلکاروں کو جان سے مارنے کی دھمکیاں دی گئیں اور ان سے سرکاری سامان چھینا گیا۔پی ٹی آئی کے گرفتار رہنماؤں کو آج اسلام آباد کی ضلعی عدالتوں میں پیش کیا جائے گا، جس کے لیے عدالت کے باہر سیکورٹی ہائی الرٹ کر دی گئی ہے۔عدالت کے باہر اسلام آباد پولیس کے اہلکار اور افسران پریزن وین کے ساتھ موجود ہیں۔