جامعہ بلوچستان کا مالی بحران‘ اکیڈمک اسٹاف کا صدر،وزیراعظم کو خط بھیجنے کا فیصلہ

کوئٹہ(پ ر) اکیڈمک سٹاف ایسوسی ایشن جامعہ بلوچستان کی کابینہ کا اجلاس پروفیسر ڈاکٹر کلیم اللہ بڑیچ کی صدارت میں ہوا جس میں نائب صدر پروفیسر ارسلان شاہ، جنرل سیکرٹری فریداچکزئی، ڈاکٹر سعید احمد ایسوٹ، ڈاکٹر شبیر احمد شاہوانی، فائزہ میر، ڈاکٹر کامران تاج، پروفیسر مسعود مندوخیل نے شرکت کی، اجلاس میں اکیڈمک سٹاف ایسوسی ایشن کی جنرل باڈی اجلاس میں اساتذہ کے پیش کردہ تجاویز اور رائے کا تفصیلی جائزہ لیا گیا اور ان تجاویز اور رائے کے پیش نظر متفقہ طور فیصلہ کیا گیا کہ جامعہ بلوچستان و ریسرچ سینٹرز کو درپیش مالی و انتظامی بحران کے حوالے سے تفصیلی کھلا خط صدر ، وزیراعظم ،گورنر ، وزیر اعلیٰ سمیت تمام سیاسی جماعتوں، طلباء تنظیموں، وکلاء ،صحافیوں اور سول سوسائٹی کو بھیجا جائے گا۔ اجلاس میں واضح کیا کہ جامعہ بلوچستان و ریسرچ سینٹرز کے اساتذہ اور ملازمین ماہانہ تنخواہوں اور پنشن کی عدم ادائیگی کی وجہ سےمشکلات کا شکار ہے، مسئلے کے مستقل حل کے لئے 16 ستمبر سے جامعہ کے اساتذہ مجبوراً علامتی بھوک ہڑتالی کیمپ مین گیٹ کے سامنے روزانہ کی بنیاد پر لگائینگے، حکومت نے توجہ نہ دی تو اگلے ہفتے سے پریس کلب کوئٹہ کے سامنے علامتی بھوک ہڑتالی کیمپ اور آخر میں بلوچستان اسمبلی کے سامنے احتجاجی کیمپ لگایا جائے گا جس میں جامعہ کے اساتذہ کرام مجبورا احتجاجاً اجتماعی استعفے بھی پیش کرینگے ۔