فورتھ شیڈول جیسے حربوں سے بے چینی میں مزید اضافہ ہوگا ، نیشنل پارٹی

کوئٹہ(پ ر)نیشنل پارٹی کے مرکزی ترجمان نے کہا ہے کہ ریاست کی جانب سے بلوچستان میں سینکڑوں لوگوں کے نام فورتھ شیڈول میں شامل کرکے ان تمام لوگوں کی سماجی زندگیوں کو متاثر کیاجارہا ہے ، فورتھ شیڈول میں شامل کیے گئے لوگوں میں بلوچ پروفیسرز، ٹیچرز، ادیب، ڈاکٹرز، صحافی ، سیاسی ، سماجی و انسانی حقوق کے کارکنوں کا تعلق مسلح تنظیموں سے جوڑ کر ان کواور ان کے اہل خانہ کو ذہنی اذیت کا نشانہ بنایا جارہا ہے جو قابل مذمت ہے، لوگوں کو خوف زدہ اور ذہنی اذیت میں رکھنے کے لیے فورتھ شیڈول جیسے حربے استعمال کئے جا رہے ہیں ۔بلوچستان میں قیام امن کے بجائے ایسی کاوشوں سے بے چینی میں مزید اضافہ ہوگا اس لئے ریاست اور حکومت کو سنجیدگی کا مظاہرہ کرتے ہوئے ایسے حربوں سے اجتناب کرنا چاہیے۔ ترجمان نے کہا کہ بلوچستان پہلے سے پسماندگی بیروزگاری بدحالی کے ساتھ بدترین بدامنی اور انسرجنسی سے دوچار ہے اب فورتھ شیڈول جیسے عوامل سے اس بے چینی میں مزید اضافہ ہوگا جو بلوچستان میں امن کی راہ میں بدترین رکاوٹ ثابت ہوگی۔ اس وقت بلوچستان میں مارشل لا سے بھی بدترین صورتحال پیدا کی گئی ہے، ریاست و حکومت حالات کے نزاکت کو سامنے رکھتے ہوئے اس عمل سے اجتناب کرے اور سیاسی کارکن ، طالبعلم ڈاکٹرز آفیسرز پروفیسرز سمیت سماجی رہنمائوں کے شامل کیئے گئے نام فورتھ شیڈول سے فی الفور نکال دیا جائے۔