پاکستان نے ایک سال کیلئے سعودی عرب سے 1.2؍ ارب ڈالر کے تیل کی سہولت مانگ لی

اسلام آباد (مہتاب حیدر) پاکستان نے ایک سال کیلئے مالیاتی خلاء پورا کرنے کی خاطر سعودی عرب سے 1.2؍ ارب ڈالر کے تیل کی سہولت مانگ لی۔ تفصیلات کے مطابق پاکستان نے سعودی عرب سے 1.2 ارب ڈالر کی سعودی آئل فیسلیٹی (SOF) فراہم کرنے کی درخواست کی ہے تاکہ موجودہ مالی سال کے لیے آئی ایم ایف کی جانب سے شناخت شدہ 2 سے 2.5 ارب ڈالر کے مالیاتی خلا کو پورا کیا جا سکے۔تاہم بدھ کے روز وزارت خزانہ کی جانب سے وزیر خزانہ اور سعودی سفیر کی ملاقات کے حوالے سے جاری کردہ سرکاری بیان میں اس بارے میں کچھ نہیں کہا گیا۔سرکاری ذرائع کا کہنا ہے کہ پاکستان نے سعودی عرب سے 1.2 ارب ڈالر کی سعودی آئل فیسلیٹی فراہم کرنے کی درخواست کی ہے جو اگلے 12 ماہ کے لیے ہوگی۔ اسلام آباد نے اسلامک ڈیولپمنٹ بینک کے ITFC فیسلیٹی کے لیے بھی 400 سے 500 ملین ڈالر کی درخواست کی ہے، اس کے علاوہ، خلیجی ممالک کے کمرشل بینکوں اور اسٹینڈرڈ چارٹرڈ بینک سے 1 ارب ڈالر کا غیر ملکی قرض حاصل کرنے کی بھی درخواست کی جا رہی ہے۔2.5 ارب ڈالر کی اضافی مالیات کو پورا کرنے کے ساتھ ساتھ، پاکستان نے تین دو طرفہ قرض دہندگان سے اسٹیٹ بینک آف پاکستان میں موجود 12 ارب ڈالر کے ڈپازٹس کے رول اوور کی درخواست بھی کی ہے۔ چین سے 4 ارب ڈالر کے کمرشل ری فنانسنگ کی ضرورت ہے تاکہ موجودہ مالی سال کیلئے مجموعی طور پر 26.2 ارب ڈالر کی ضرورت پوری کی جا سکے۔وزارت خزانہ کی جانب سے جاری کردہ سرکاری بیان کے مطابق، وفاقی وزیر برائے خزانہ و محصولات، سینیٹر محمد اورنگزیب نے معیشت کے کلیدی شعبوں میں جامع ادارہ جاتی اصلاحات پر مبنی ایک ملکی اقتصادی ایجنڈے کے لیے پاکستان کے عزم کا اعادہ کیا۔وزیر نے یہ بات آج فنانس ڈویژن میں سعودی عرب کے سفیر نوّاف بن سعید المَالکی سے ملاقات کے دوران کہی، جنہوں نے ان سے ملاقات کی۔ سینیٹر اورنگزیب نے سعودی عرب کی جانب سے پاکستان کو مسلسل اقتصادی مدد فراہم کرنے پر گہری تعریف کا اظہار کیا، اور پاکستانی نجی شعبے کے ساتھ مشترکہ منصوبوں اور کاروباری تعاون میں سعودی سرمایہ کاروں کی بڑھتی ہوئی دلچسپی کو اجاگر کیا۔ سعودی سفیر نے پاکستان میں ساختی اور ادارہ جاتی اصلاحات کے نفاذ میں حکومت کی کوششوں کی تعریف کی اور پاکستان کی اقتصادی ترقی میں اپنا کردار ادا کرنے کے لیے سعودی عرب کے پختہ عزم کا اعادہ کیا۔