مجوزہ آئینی پیکیج پر حکومت نے پیپلز پارٹی خدوخال سے آگاہ کردیا

اسلام آباد (محمد صالح ظافر/خصوصی تجزیہ نگار) حکومت نے اوپن اور نمایاں قدم کے طورپر مجوزہ آئینی پیکیج کے حوالے سے اپنی سب سے بڑی حلیف پیپلز پارٹی کو اعتماد میں لے لیا ہے اور اسے آئینی اصلاحات کے خدوخال سے بدھ کی شب آگاہ کردیا گیا ہے۔ وزیراعظم شہباز شریف اور پیپلز پارٹی کے چیئرمین بلاول بھٹو زرداری کے درمیان اپنے ترمیمی معاونین کے ہمراہ ایوان وزیراعظم کی ملاقات میں اس معاملے میں کامل اتفاق رائے ہوگیا ہے۔ وزیراعظم کی معاونت نائب وزیر اعظم وزیر خارجہ سینیٹر اسحٰق ڈار، قانون و انصاف اور پارلیمانی امور کے وفاقی وزیر سینیٹر اعظم نذیر تارڑ، اطلاعات و نشریات کے وفاقی وزی عطاءاللہ تارڑ نے کی جبکہ بلاول بھٹو زرداری کے ساتھ پیپلز پارٹی کی پارلیمانی پارٹی کے گروپ لیڈر سابق وفاقی وزیر سید نوید قمر، میئر کراچی بیرسٹر مرتضیٰ وہاب موجود تھے۔