کلثوم نواز نے بہادری اور صبر و استقامت کی ناقابل فراموش تاریخ لکھی، وزیراعظم

اسلام آباد (نیوز رپورٹر) وزیراعظم شہباز شریف نے سابق خاتون اول اور پاکستان مسلم لیگ (ن) کے صدر نواز شریف کی اہلیہ کلثوم نواز کی چھٹی برسی پر ان کو خراجِ عقیدت پیش کیا۔ وزیراعظم نے کہا کہ بہن کلثوم نواز کی وفات کا غم ہمارا پورا خاندان نہ کبھی بھولا ہے اور نہ بھول سکتا ہے۔ کلثوم نواز کی ملک و قوم اور جمہوریت کے لئے خدمات کو خراج تحسین پیش کرتے ہیں۔ کلثوم نواز نے بطور اہلیہ، ماں، بہن اور سیاسی قائد، جرات و بہادری اور صبر و استقامت کی ناقابل فراموش تاریخ لکھی۔ وزیراعظم نے کہا کہ مسلم لیگ (ن) کے صدر نواز شریف کے لئے وہ ایک فولادی ڈھال تھیں۔ آمریت کے خلاف ان کی قابل فخر اور یادگار تحریک سیاسی تاریخ کا روشن باب ہے۔ وہ مشرقی روایات اور اقدار کا پیکر تھیں، بڑوں کا احترام، چھوٹوں سے شفقت اور ہمیشہ دانائی کی بات کرنا ان کی شخصیت کا حصہ تھا۔ وزیراعظم نے دعا کی کہ اللہ تعالیٰ ان کے درجات بلند فرمائے۔