راہول گاندھی کی امریکی کانگریس کی خاتون مسلم رکن الہان عمر سے ملاقات

اسلام آباد (فاروق اقدس) بھارت کے اپوزیشن لیڈر اور سابق حکمراں جماعت کانگریس کے مرکزی رہنما راہل گاندھی نے جو ان دنوں امریکا کے دورے پر ہیں جہاں انہوں نے کانگریس کی مسلم رکن الہان عمر سے ملاقات کی ہے جس پر بی جے پی کے حلقوں میں صفِ ماتم کا سا سماں ہے۔ بی جے پی کا کہنا ہے کہ الہان عمر واضح بھارت مخالف طرزِ فکر و عمل رکھتی ہیں اور وہ بارہا بھارت کے خلاف بول چکی ہیں۔ الہان عمر ایوانِ نمائندگان کی رکن ہیں۔ وہ امریکی کانگریس کی رکن منتخب ہونے والی پہلی دو مسلم خواتین میں سے ہیں۔ یاد رہے کہ الہان عمر پاکستان کے دروے پر بھی آچکی ہیں۔ راہل گاندھی کی ملاقات پر بھارتیہ جنتا پارٹی نے شدید ردِعمل ظاہر کرتے ہوئے کہا ہے کہ امریکی کانگریس کی جو رکن واضح بھارت مخالف موقف اور رویہ رکھتی ہے اُس سے ملاقات کرکے راہل گاندھی نے اہلِ بھارت کا دل دکھایا ہے۔ الہان عمر نے بھارت میں بنیادی حقوق اور بالخصوص مسلمانوں اور دیگر اقلیتوں کے معاملات میں بنیادی مذہبی آزادیوں کی خلاف ورزی کی جامع تحقیقات کے لیے ایک قرارداد بھی پیش کی۔