اسمبلی صدارتی انتخابات کراسکتی ہے تو سینٹ کا کیوں نہیں ،پشاور ہائیکورٹ

پشاور (نمائندہ جنگ)پشاور ہائیکورٹ کے ۔ جسٹس وقار احمد نے کہا کہ صوبائی اسمبلی اگر صدارتی انتخابات کراسکتی ہے تو پھر سینٹ انتخابات کیوں نہیں ہوسکتے۔ خیبرپختونخوا میں سینٹ انتخابات کے انعقاد کے لئے دائر درخواست پر سماعت دوران فریقین کے وکلاء کی ایک دوسرے کے ساتھ الجھنے کی کوشش پر چیف جسٹس اشتیاق ابراہیم نے کہا کہ اگر آپ ایسے جھگڑتے ہیں تو ہم اس کیس کو ملتوی کرتے ہیں۔عدالت نے مزید سماعت آج تک ملتوی کردی ۔ گزشتہ روز دوران سماعت درخواست گزار اعظم سواتی کے وکیل علی زمان ایڈووکیٹ نے عدالت کو بتایا کہ اس سال2 اپریل کو سینٹ انتخابات ہونے تھے مگر پھر وہ ملتوی ہوئے۔مخصوص نشستوں کے حوالے سے پشاور ہائیکورٹ کے فیصلے کے خلاف درخواست گزاروں نے سپریم کورٹ میں اپیل دائر کی ۔سپریم کورٹ کا مخصوص نشستوں کے حوالے سے فیصلہ ہمارے حق میں آیا ہے۔ چیف جسٹس نے استفسار کیا کہ اس وقت صوبے کےکتنی ممبران سینٹ میں ہیں جس پر وکیل الیکشن کمیشن نے کہا کہ اس وقت صوبے کی 7 ممبران سینٹ میں نمائندگی کررہے ہیں۔ چیف جسٹس نے کہا کہ اب تو سپریم کورٹ کا فیصلہ آگیا ہےآپ کیسے صوبے کو نمائندگی سے محروم کررہے ہیں ۔