پنجاب، سی ٹی ڈی کے مختلف شہروں میں انٹیلی جنس بیسڈ آپریشن ،9دہشتگرد گرفتار

لاہور (آئی این پی ) محکمہ انسداد دہشتگردی (سی ٹی ڈی) نے دہشتگردی کے خدشات کے پیش نظر پنجاب کے مختلف شہروں میں 71انٹیلی جنس بیسڈ آپریشن کے دوران 9دہشت گرد گرفتار کرلیے ۔ ترجمان سی ٹی ڈی کے مطابق یہ کارروائیاں لاہور ،میانوالی، بہاولپور ، رحیم یار خان ، ساہیوال ، راولپنڈی ، فیصل آباد، جہلم، چکوال میں کی گئیں ،اس دوران میانوالی سے فتنہ الخوارج اور فیصل آباد سے داعش کا ایک،ایک خطرناک دہشت گرد گرفتارکرلیاگیا۔ انہوں نے کہا کہ دہشت گردوں سے دھماکہ خیز مواد ، دو ہینڈ گرنیڈ ، 26 ڈیٹونیٹر ، 73 فٹ حفاظتی فیوز وائر، گولیاں اور اسلحہ ، موبائل فون اور نقدی برآمدکرلی گئی۔ دہشت گردوں کی شناخت عبدالکریم ، عثمان ، عمران صدیقی ، شانی ، شوکت ، احمد خان ، شیراز محمود ، سعید الرحمن اور مستجاب کے نام سے ہوئی ہے ۔ انہوں نے کہا کہ دہشت گرد مختلف مقامات پر کارروائی کر کے عوام میں خوف و ہراس پھیلانا چاہتے تھے، سی ٹی ڈی نے رواں ہفتے میں 978 کومبنگ آپریشنز کے دوران 78 مشتبہ افراد گرفتار کیے ، کومبنگ آپریشنز میں 34694 افراد سے پوچھ گچھ کی گئی ۔