جنوبی پشتونخوا میں دہشتگردی کے واقعات تسلسل کیساتھ جاری ہیں‘ پشتونخوامیپ

کوئٹہ ( پ ر) پشتونخواملی عوامی پارٹی کے صوبائی بیان میں کچلاک میں پولیس وین پر ہونیوالے بم دھماکے کی مذمت کرتے ہوئے واقعہ میں اے ایس آئی زین الدین ترین عرف لالو کی شہادت اور دیگراہلکاروں وشہریوں کے زخمی ہونےاور شاہرگ میں کوئلہ کان میں گیس بھرنے اور پانچ کانکنوں کی اموات پر دکھ اور افسوس کا اظہار کرتے ہوئے کہا گیا ہے کہ جنوبی پشتونخوا کے اضلاع میں دہشتگردی کے واقعات تسلسل کے ساتھ جاری ہیں۔ پشین ،ژوب، شیرانی ، لورالائی ،موسیٰ خیل ، زیارت، سنجاوی ، سبی، ہرنائی اور کوئٹہ میں پے در پے دہشتگردی کے واقعات ہورہے ہیں ،ان واقعات میں ملوث عناصر آج تک قانون کی گرفت سے آزاد اور انہیں عوام کے سامنے بے نقاب نہیں کیا گیا۔ دہشتگردی کے واقعات میں عوام کا خون ناحق بہانے کے ساتھ ان کی ٹرانسپورٹ ودیگر املاک کو نذر آتش کرکے جانی ومالی نقصان سے دوچار کیا جارہا ہے ،اورسازش کے تحت صوبے کی فورسز لیویز اور پولیس کو نشانہ بنایاجارہا ہے ۔ بیان میں مطالبہ کیا گیا کہ دہشتگردی کے واقعات میں ملوث عناصر کو قانون کے کٹہرے میں لایا جائے اور عوام کی جان و مال کے تحفظ کیلئے اقدامات اٹھائے جائیںجبکہ ہرنائی واقعہ میں جاں بحق ہونیوالوں کی میتوں کو آبائی علاقے بھجوانے اور ورثا کو محکمہ مائنز اور کول مائنز کمپنی فوری طور پر معاوضہ ادا کیا جائے۔