ایف بی آر انعامی اسکیموں میں بنیادی تبدیلیوں کیلئے پوری طرح تیار

اسلام آباد (مہتاب حیدر) فیڈرل بورڈ آف ریونیو (ایف بی آر) پوائنٹ آف سیل (پی او ایس) کیساتھ مربوط انوائسز پر انعامی اسکیموں میں بنیادی تبدیلیاں لانے کے لیے پوری طرح تیار ہے جیساکہ تمام غیر تصدیق شدہ انوائسز پر بورڈ ہر رسید پر 25 ہزار روپے کا انعام دے گا۔ تاہم ایک ماہ میں ایک فرد کے لیے ایک انعام ہوگا۔ ماضی میں انعامی اسکیم ٹیکس وصولی کو بہتر بنانے کے لیے مطلوبہ تبدیلیاں لانے میں ناکام رہی تھی۔ دائرہ اختیار کا متعلقہ چیف کمشنر ایک ہفتے تک تحقیقات کرے گا اور اگر یہ ثابت ہوتا ہے کہ کسی ریٹیلر یا ریسٹورنٹ کی رسید پی او ایس کے ساتھ مربوط نہیں تو انعامی رقم اس فرد کے اکاؤنٹ میں منتقل کر دی جائے گی جس نے غیر تصدیق شدہ رسید پیش کی ہے۔ اعلیٰ سرکاری ذرائع نے دی نیوز کو تصدیق کی کہ ہم ڈیجیٹلائزیشن پروگرام کے تحت ان تبدیلیوں کی منصوبہ بندی کر رہے ہیں اور جلد ہی انعامی اسکیم میں یہ تبدیلیاں متعارف کرائی جائیں گی۔