خراب موسم ، سکردو، اسلام آباد کا فلائٹ آپریشن متاثر، 4 پروازیں ایئرپورٹس پر اتاری گئیں

کراچی (افضل ندیم ڈوگر) شدید بارش کی وجہ سے اسلام اباد اور اسکردو ایئرپورٹس کا فلائٹ آپریشن متاثر ہوا ۔ جس کی وجہ سے منزلوں پر پہنچی 4 پروازیں لینڈ نہ کر سکیں انہیں متبادل ایئرپورٹس پر اتارا گیا جبکہ 34 پروازیں تاخیر کا شکار ہوئی ہیں۔ ایوی ایشن ذرائع کے مطابق کویت سٹی اسلام آباد کی غیرملکی پرواز کے یو 205، شارجہ اسلام اباد سے نجی ایئرلائن کی پرواز 9پی 743 اور پی ائی اے کی جدہ اسلام اباد کی پرواز پی کے 942 کو لاہور لینڈ کرایا گیا۔ اسکردو میں موسم خراب ہونے کی وجہ سے کراچی سے پہنچی پرواز پی کے 455 لینڈ نہ کر سکی جسے اسلام اباد اتار لیا گیا۔ موسم خراب ہونے کی وجہ سے اسکردو سے کراچی کی پرواز پی کے 456 منسوخ کر دی گئی۔ اسلام اباد سے اسکردو، چترال، گلگت کی 6 پروازیں منسوخ کی گئیں۔