ایف بی آر انعامی سکیموں میں بنیادی تبدیلیوں کیلئے پوری طرح تیار

اسلام آباد (مہتاب حیدر) فیڈرل بورڈ آف ریونیو (ایف بی آر) پوائنٹ آف سیل (پی او ایس) کے ساتھ مربوط انوائسز پر انعامی اسکیموں میں بنیادی تبدیلیاں لانے کے لیے پوری طرح تیار ہے جیساکہ تمام غیر تصدیق شدہ انوائسز پر بورڈ ہر رسید پر 25 ہزار روپے کا انعام دے گا۔ تاہم ایک ماہ میں ایک فرد کے لیے ایک انعام ہوگا۔ ماضی میں انعامی اسکیم ٹیکس وصولی کو بہتر بنانے کے لیے مطلوبہ تبدیلیاں لانے میں ناکام رہی تھی۔ دائرہ اختیار کا متعلقہ چیف کمشنر ایک ہفتے تک تحقیقات کرے گا اور اگر یہ ثابت ہوتا ہے کہ کسی ریٹیلر یا ریسٹورنٹ کی رسید پی او ایس کے ساتھ مربوط نہیں تو انعامی رقم اس فرد کے اکاؤنٹ میں منتقل کر دی جائے گی جس نے غیر تصدیق شدہ رسید پیش کی ہے۔ اعلیٰ سرکاری ذرائع نے دی نیوز کو تصدیق کی کہ ہم ڈیجیٹلائزیشن پروگرام کے تحت ان تبدیلیوں کی منصوبہ بندی کر رہے ہیں اور جلد ہی انعامی اسکیم میں یہ تبدیلیاں متعارف کرائی جائیں گی۔ ایف بی آر پی او ایس کے ساتھ مربوط نہ ہونے والی جعلی یا کچی رسید کی اطلاع دینے کی بنیاد پر انعامات دینے کا ارادہ رکھتا ہے۔ ایف بی آر ایک ایپ تیار کرے گا جس پر جعلی یا کچی رسید کی اطلاع دینے کی سہولت ہوگی۔ اس کے بعد ایف بی آر زیادہ سے زیادہ ایک ہفتے کے مخصوص ٹائم فریم میں اس کی تحقیقات کرے گا۔ یہ ثابت کرنے کی صورت میں کہ رسید پی او ایس کے ساتھ مربوط نہیں ہے، شکایت کنندہ کو 25 ہزار روپے فراہم کیے جائیں گے اور اس کے بینک اکاؤنٹ میں منتقل کیے جائیں گے۔ ایک مہینے میں ایک سی این آئی سی کے لیے ایک انعام ہوگا۔