فراڈیوں نے لیسسٹر کار پارک کی مشینوں پر اسٹیکر لگادیئے، روس سے تعلق کا انکشاف

لندن (پی اے) فراڈیوں نے لیسسٹر کار پارک کی مشینوں پر اسٹیکر لگا دیئے، اس اسکینڈل کا تعلق روس سے بتایا جاتا ہے۔ فراڈیوں کی جانب سے لگائے جانے والے اسٹیکرز میں موبائل فون سے ادائیگی کرنے کے خواہاں لوگوں کو دھوکہ دینے کیلئے ایک کیو آر کوڈ لگایا گیا ہے، جس کی وجہ رقم کسی غلط جگہ پر پہنچ جاتی ہے۔ یہ کوڈ لیسسٹر کی بعض مشینوں میں لگائے گئے ہیں، جن کا تعلق ایک ویب سائیٹ کے پتے سے ہے، جو اسی مہینے روس سے تعلق رکھنے والے ایک ادارے سے خریدا گیا تھا۔ یہ ویب سائیٹ اسکینڈل ایک ای میل کے ساتھ جڑا ہوا ہے، جو روس میں رجسٹرڈ ہے، جو 2021 سے مختلف اسکینڈلز میں ملوث رہی ہے۔ ایک ترجمان کا کہنا ہے کہ ہمیں جتنے اسٹیکرز مل سکے، وہ سب ہم نے ہٹا دیئے ہیں، اگر آپ کو کسی اسٹیکر کے بارے میں معلومات ہیں تو برائے مہربانی parkingoffice@leicester.gov.uk پر ای میل کر کے اطلاع دیں۔