ووٹوں کے ڈبے کھلنے کے بعد فارم 45 ہو یا 75 اس کی کوئی حیثیت نہیں رہتی،چیف جسٹس سپریم کورٹ

اسلام آباد(جنگ رپورٹر)سپریم کورٹ نے بلوچستان اسمبلی کے حلقہ پی بی14 نصیر آباد کی نشست پر دوبارہ گنتی سے متعلق پاکستان پیپلز پارٹی کے امیدوار غلام رسول کی درخواست خارج کردی ،چیف جسٹس قاضی فائز عیسیٰ کی سربراہی میں قائم تین رکنی بینچ نے پریزائڈنگ افسران کے خلاف جانبداری کے الزامات مسترد کرتے ہوئے قرار دیا کہ الزامات کا کوئی ثبوت ریکارڈ پر موجود نہیں،دوران سماعت چیف جسٹس نے آبزرویشن دی ہے کہ ووٹوں کے سامنے فارم 45 کی کوئی اہمیت نہیں ،انتخابات میں سب سے اہم ثبوت ووٹ ہوتے ہیں ،فارم 45تو پریزائڈنگ افسران بھرتے ہیں، درخواست گزار کے وکیل نے موقف اختیار کیا کہ پریزائڈنگ افسران نے غلط نتائج مرتب کیے ہیں،انہوں نے حلقے کے 96 پولنگ اسٹیشنوں میں سے 7 پولنگ اسٹیشنوںپر دوبارہ گنتی کی استدعا کی،جس پر چیف جسٹس نے ان سے استفسار کیا کہ آپ کو کیسے پتہ چلا کہ غلط رزلٹ تیار کیا گیا ہے؟ فاضل وکیل کا کہنا تھا کہ پریزائڈنگ افسران جانبدار تھے،انہوں نے فارم 45 کے مطابق رزلٹ مرتب نہیں کیے ۔چیف جسٹس نے کہا ووٹوں کے ڈبے کھلنے کے بعد فارم 45 ہو یا 75 اسکی حیثیت نہیں رہتی ہے ،جسٹس نعیم اختر افغان نے فاضل وکیل کو مخاطب کرتے ہوئے کہا کہ پریزائیڈنگ افسران نے اصل ریکارڈ پیش کیا ہے جبکہ آپ کا موکل کاپیوں پر کیس چلا رہے ہیں؟آپ کے موکل کے گواہوں نے پریذائیڈنگ افسران کا نام تک غلط بتایاہے ،آپ کے گواہ تو خود کو پولنگ ایجنٹ بھی ثابت نہیں کرسکے ہیں،چیف جسٹس نے کہاکہ آپ کا تو دعو یٰ ہی غلط ہے،آپ کا مقدمہ یہ ہے کہ پریزائیڈنگ افسران میرے ساتھ تعصب رکھتے ہیں ،آپ نے دوبارہ گنتی پر اعتراض بھی نہیں کیا ہے ،جسٹس شاہد بلال نے کہا کہ یہ بہت سادہ کیس ہے،ریکارڈ سے آپ کے الزامات ثابت نہیں ہوتے ہیں،فاضل وکیل نے کہافیصلے میں میرے موکل کو جھوٹاکہا گیا ہے جس پر چیف جسٹس نے کہا کہ جھوٹ، سچ کو تو اللہ ہی جانتا ہے ہم دستیاب حقائق پر ہی فیصلے کرتے ہیں، یہ کوئی میاں بیوی کا مقدمہ نہیں جو سچا جھوٹا پر فیصلہ کریں گے، فیصلہ ریکارڈ پر ہوتا ہے،پریزائیڈنگ افسران کی جانبداری ثابت کریں ، انہوںنے مزید کہا کہ پریزائڈنگ افسر جانی دشمن بھی ہوتو فیصلہ ووٹ سے ہی ہوتا ہے،فاضل وکیل نے کہا کہ سارا فراڈ پریزائڈنگ افسران نے کیا ہے ،جس پر چیف جسٹس نے انہیں روکتے ہوئے کہا کہ آپ یونہی الزامات نہ لگائیں ،قانون یا کوئی حقائق پیش کریں کہ پریذائڈنگ افسران جانبدار تھے،بعد ازاں عدالت نے پاکستان مسلم لیگ ن کے امیدوارمحمد خان لہری کی کامیابی کا فیصلہ برقرار رکھتے ہوئے 7پولنگ اسٹیشنوں میں دوبارہ گنتی کی غلام رسول کی درخواست مسترد کردی ۔