چین سپرپاور، دنیا اس کے بغیر آگے نہیں بڑھ سکتی،، وزیراعظم

اسلام آباد (نمائندہ جنگ) وزیراعظم شہباز شریف نے کہا ہے کہ چین دنیا کی سپر پاور ہے، دنیا اس کے بغیر آگے نہیں بڑھ سکتی آئی ایم ایف کیساتھ مذاکرات کے دوران چین کی جانب سے مسلسل تعاون فراہم کرنے پر شکر گزار ہیں۔ صدر مملکت آصف علی زرداری نے کہا کہ سی پیک کو اعلیٰ معیار پر ترقی دیں گے ۔ ان خیالات کا اظہار انہوں نے چین کے 75ویں یوم تاسیس کی تقریب سے خطاب کرتے ہوئے کیا۔ وزیراعظم نے چین کی حکومت اور عوام کو یوم تاسیس کی مبارکباد دیتے ہوئے کہا کہ چین کا یوم تاسیس منانا خوش آئند ہے،پاک چین دوستی کا مقصد نہ صرف خطے میں ترقی، امن بلکہ شی جن پنگ کے وژن کے تحت دنیا بھر میں ترقی اور امن کو فروغ دینا ہے،پاکستان ہانگ کانگ تائیوان اور دیگر عالمی امور پر چین کے موقف کی حمایت کرتا ہے، سی پیک کا دوسرا مرحلہ شروع کرنے جا رہے ہیں جس سے پاکستان کی معیشت کو فائدہ پہنچے گا۔ چین کے سفیر ژیانگ زیڈونگ نے تقریب سے خطاب کرتے ہوئے کہا کہ صدر شی جن پنگ نے چین کی سماجی اور معاشی ترقی پر مبنی نئے شعبوں کی بنیاد رکھی، شی جن پنگ کی قیادت میں ترقی کے نئے دور کا آغاز ہوا۔ تقریب سے صدر مملکت آصف علی زرداری نے بھی خطاب کیا ۔صدر مملکت آصف علی زرداری اور وزیراعظم محمد شہباز شریف نے چین کے 75 ویں یوم تاسیس کا کیک بھی کا ٹا ۔