صنعت و تجارت کے بغیر ترقی کا خواب شرمندہ تعبیر نہیں ہو سکتا،جعفر مندوخیل

کوئٹہ(اسٹاف رپورٹر)گورنر بلوچستان شیخ جعفر خان مندوخیل نے کہا ہے کہ صنعت و تجارت کے بغیر کسی ملک اور صوبے کی ترقی کا خواب شرمندہ تعبیر نہیں ہو سکتا،بزنس کمیونٹی کسی بھی ملک اور صوبے کی معیشت میں ریڑھ کی ہڈی کی حیثیت رکھتی ہے،پاکستان اور بلوچستان کا مفاد کاروبار کو پروموٹ کرنے میں ہے۔ چیمبر آف کامرس اینڈ انڈسٹری کوئٹہ بلوچستان کی صوبے کی بزنس کمیونٹی کیلئے خدمات ناقابل فراموش ہیں۔ان خیالات کا اظہار انہوں نےگزشتہ روز ایوان صنعت و تجارت کوئٹہ بلوچستان کے سالانہ جنرل باڈی اجلاس سے خطاب کرتے ہوئے کیا۔اس سے قبل چیمبر آف کامرس اینڈ انڈسٹری کوئٹہ بلوچستان کے پیٹرن ان چیف غلام فاروق خلجی، بلا مقابلہ نومنتخب صدر حاجی ایوب مریانی،سنیئر نائب صدر حاجی اختر محمد کاکڑ ،نائب صدر انجینئر میر وائس خان کاکڑ ،سابق صدر حاجی عبداللہ اچکزئی،سابق سنیئر نائب صدر حاجی آغاگل خلجی اور سابق نائب صدر سید عبدالاحد آغا و دیگر نے گورنر بلوچستان کو ایوان صنعت و تجارت کوئٹہ بلوچستان آنے پر خوش آمدید کہا۔اس موقع پر چیمبر آف کامرس کے پٹرن ان چیف غلام فاروق خلجی نے کہا کہ چیمبر آف کامرس اینڈ انڈسٹری کوئٹہ بلوچستان کے تمام18ہزار ممبران ٹیکس پیئر ہیں چیمبر کے عہدیداران و ممبران نے روز اول سے ہی ملک اور صوبے اور کاروباری طبقے کی مفادات کو مدنظر رکھ کر جدوجہد کی ہے ایوان صنعت و تجارت کوئٹہ بلوچستان کے سال 2024-26کی کابینہ کا بلا مقابلہ انتخاب صوبے کی تاجر برادری کے اتحاد و اتفاق کا مظہر ہے بزنس کمیونٹی کی چمن اور تفتان و دیگر بارڈرز پر کاروبار بری طرح متاثر ہیں انہوں نے شکوہ کیا کہ موجودہ صوبائی حکومت کی ترجیحات میں بزنس نظر نہیں آرہا ہمیں امید ہے کہ اس بابت صوبائی حکمران ضرور توجہ دیں گے۔اس موقع پر سابق صدر حاجی عبداللہ اچکزئی نے دو سالہ رپورٹ پیش کی ۔اجلاس کے شرکا ء سے خطاب کرتے ہوئے نومنتخب صدر حاجی ایوب مریانی نے کہا کہ ہم بوستان اسپیشل اکنامک زون،خضدار اسپیشل اکنامک زون،انڈسٹریل اسٹیٹ سرکی روڈ اور انڈسٹریل زون مشرقی بائی پاس کی ترقی اور فعالی کے نامکمل منصوبوں کو پایہ تکمیل تک پہنچانے کا کام کریں گے۔ انہوں نے کہا کہ بلوچستان میں لینڈ روٹ پر بزنس کمیونٹی کو 30فیصد رعایت دینے کی ضرورت ہے اس سے یہاں کاروبار میں اضافہ ہوگا اور بے روزگار نوجوانوں کو روزگار کے مواقع میسر آئیں گے۔اس موقع پر گورنر بلوچستان شیخ جعفر خان مندوخیل کا کہنا تھا کہ کاروبار کسی بھی ملک کی معیشت میں ریڑھ کی ہڈی کی حیثیت رکھتی ہے اس وقت ترقی یافتہ ممالک کی ترقی کا راز وہاں کاروبار کیلئے موزوں ماحول اور وابستہ افراد کو دی جانے والی آسانیاں ہیں جس میں وہاں کے چیمبرز نے بھر پور کردار ادا کیا ہے مجھے خوشی ہے کہ چیمبر آف کامرس اینڈ انڈسٹری کوئٹہ بلوچستان بھی صوبے کی فعال ترین چیمبر ہے اس کی صوبے کی بزنس کمیونٹی کیلئے خدمات اپنی مثال آپ ہیں انہوں نے کہا کہ میں چمن بارڈر سے متعلق دو بار وزیر اعظم میاں شہباز شریف سے ملاقاتیں کر چکا ہوں قانونی تجارت کو اسمگلنگ سے مربوط کرنا درست نہیں میں صوبے کی کاروباری طبقے کے مسائل وفاق تک پہنچانے کیلئے ہمہ وقت تیار ہوں اور گورنر ہائوس بلوچستان کے دروازے بزنس کمیونٹی کیلئے ہمیشہ کھلے ہیں انہوں نے کہا کہ کوئٹہ ائیر پورٹ کے قریب سرکاری اراضی دستیاب ہوئی تو پروسیسنگ پلانٹس اور ایگزیبیشن سنٹرز کیلئے دے دیں گے۔ انہوں نے بوستان اسپیشل اکنامک زون میں صنعتیں لگنے کو خوش آئند قرار دیا اور کہا کہ اس سے صوبے میں پیداوار بڑھے گی اور بے روزگار نوجوانوں کو روزگار کے مواقع میسر آئیں گے انہوں نے کہا کہ سرکاری ملازم اپنے لئے جبکہ بزنس مین دوسروں کیلئے روزگار کے مواقع فراہم کرتا ہے۔ آخر میں انہوں نے سابقہ صدر حاجی عبداللہ اچکزئی ،سنیئر نائب صدر حاجی اختر محمد کاکڑ اور سید عبدالاحد آغا کو میڈل پہنائے جبکہ سردار عبدالرحمن کھیتران نے نومنتخب صدرور کو گلدستے پیش کئے۔