امریکا میں سمندری طوفان نے تباہی مچادی،90سے زائد ہلاکتیں

کراچی(نیوزڈیسک) امریکا میں سمندری طوفان ہیلن نے 5 ریاستوں فلوریڈا، جارجیا، ورجینیا، ساؤتھ اور نارتھ کیرولینا میں نظام زندگی کو درہم برہم کرکے رکھ دیا۔ 90 سے زیادہ ہلاکتوں کی تصدیق ہوئی ہے،عالمی خبر رساں ادارے کے مطابق امریکا کی 5 ریاستوں میں سمندری طوفان ہیلن کی تیز ہواؤں نے اپنے راستے میں آنے والی ہر چیز کو تہس نہس کرکے رکھ دیا۔ متاثرہ علاقوں کے اسکول اور دفاتر بند ہوگئے۔سمندری طوفان ہیلن کی تیز ہواؤں کے ساتھ ہونے والی مسلسل بارش نے معمولات زندگی معطل کر کے رکھ دیے۔ سڑکیں تالاب کا منظر پیش کرنے لگیں۔ پل تباہ ہوگئے اور لاکھوں صارفین بجلی سے محروم ہوگئے۔ان پانچوں ریاستوں کے متاثرہ علاقوں میں مواصلاتی نظام بھی معطل ہو کر رہ گیا۔ مالی نقصان 100 ارب ڈالرز تک ہونے کا امکان ہے اور 90 سے زیادہ ہلاکتوں کی تصدیق ہوئی ہے۔متاثرہ علاقوں میں بحالی کا کام جاری ہے جس کی تکیمل میں 5 سے 7 دن لگ سکتے ہیں۔ محکمہ موسمیات نے آئندہ ایک دو روز تک بارشیں جاری رہنے کا امکان ظاہر کیا ہے۔شہریوں کو سمندری طوفان کے تھمنے تک ساحلوں پر نہ جانے کی ہدایت کی گئی ہے جب کہ میونسپل اداروں اور اسپتالوں کو الرٹ کردیا گیا۔