سندھ ہائیکورٹ، تعلیمی بورڈز کے چیئرمینز کی تقرریوں کیخلاف حکم امتناع سے متعلق درخواست سماعت کے لئے منظور

کراچی ( اسٹاف رپورٹر ) سندھ ہائی کورٹ نے صوبے کے تعلیمی بورڈز کے چیئرمینز کی تقرریوں کے خلاف حکمِ امتناع سے متعلق حکومت سندھ درخواست سماعت کے لئے منظور کرتے ہوئے 10اکتوبر کے لئے مقرر کردی۔ ہائی کورٹ میں صوبے کے تعلیمی بورڈز کے چیئرمینز کی تقرریوں کیخلاف حکم امتناع سے متعلق حکومت سندھ درخواست پر سماعت ہوئی۔ حکومت سندھ کے وکیل نے کہا کہ سندھ حکومت نے بورڈز آف انٹرمیڈیٹ کے چیئرمینز کی تقرری کا فیصلہ کرلیا۔ عدالتی حکم امتناع بورڈز کے سربراہوں کی تقرری میں رکاوٹ ہے۔ سندھ ہائی کورٹ نے ایک درخواست پر انٹرمیڈیٹ بورڈ کے چیئرمینز کی تقرری پر پابندی عائد کی ہوئی ہے۔ یہ انتہائی اہم معاملہ ہے، تعلیمی ماحول متاثر ہورہا ہے۔ درخواست کی فوری سماعت کی جائے تاکہ چیئرمینوں کی تقرری کا راستہ کھل سکے۔ عدالت نے حکومت سندھ کی درخواست منظور کرتے ہوئے سماعت 10اکتوبر کے لئے مقرر کردی۔ دائر درخواست میں موقف اپنایا گیا کہ بورڈز کے چیئرمین کے لیے 2021میں سرچ کمیٹی کے توسط سے اشتہار شائع کرایا گیا تھا۔ سرچ کمیٹی نے درخواست گزار کا نام شارٹ لسٹ کرکے فارورڈ کردیا۔ درخواست گزار اس وقت اسلام آباد میں تعینات ہیں، متعدد کتابوں کے مصنف ہیں۔ یہاں بورڈ کے ایسے چیئرمین لگا دیئے گئے ہیں جو امتحان میں فیل ہوگئے تھے۔ درخواست کے فیصلے تک بورڈز کے دیگر چیئرمینوں کو کام کرنے سے روکا جائے۔