گارنٹی ہے ہم پر امن،فضل الرحمٰن ہمارےساتھ ہیں ،بیرسٹرگوہر

کراچی (ٹی وی رپورٹ) جیوکے پروگرام ’’کیپٹل ٹاک ‘‘میزبان حامد میر سے گفتگو کرتے ہوئے چیئرمین تحریک انصاف، بیرسٹر گوہر علی خان نےکہا ہے کہ ہم گارنٹی کے ساتھ کہہ رہے ہیں کہ ہم پر امن ہیں،آئینی ترمیم کے معاملے پر مولانا فضل الرحمٰن ہمارے ساتھ ہیں،چیئرمین پاک چائنا انسٹی ٹیوٹ ،سینیٹر مشاہد حسین سید نےکہا اسرائیل کے پیچھے امریکا اور مغرب کی آشیرباد تھی۔وہ آشیرباد بھارت کے لئے بھی ہے۔پاکستان کا نیوکلیئر پروگرام ہماری سیکورٹی کی ضمانت ہے اس پر کوئی سمجھوتہ نہیں کرنا چاہئے،میزبان حامد میرنے تجزیہ پیش کرتے ہوئے کہا کہ ایک بہت بڑی جنگ ہمارے ہمسائے میں پہنچ چکی ہے۔ ہم کس طرح کے معاملات میں الجھے ہوئے ہیں ، بیرسٹر گوہر علی خان نےکہا احتجاج کے پلان کا ہرگز یہ مطلب نہیں ہے کہ ہم چڑھائی کررہے ہیں ، بانی پی ٹی آئی نے اعلان کیا ہے4 اکتوبر کو ڈی چوک جائیں گے۔5 اکتوبر کو لاہو رکی عوام احتجاج کرے گی،ججوں کی لڑائی کا عدلیہ اور عوام کو سخت نقصان ہورہا ہے ،قاضی فائز عیسیٰ سے لوگوں کی امید یں تھیں کہ عدلیہ میں تناؤ ختم کرائیں گے۔ یو این کی رپورٹ ہے کہ غزہ میں اتنی تباہی ہوئی ہے کہ ملبہ ہٹانے میں20 سال لگیں گے ، حسن نصر اللہ کی شہادت ایک بہت بڑا سانحہ ہے ، اسرائیل کو یہ مہنگا پڑے گا ،امریکا میں اس وقت ہائی برڈ سسٹم چل رہا ہے ۔ان کو خوف ہے کہ ٹرمپ واپس نہ آجائے ،ایران کو یہ پتہ ہے کہ جنگ نہیں کرنی ۔30 ہزار امریکی فوج اس وقت مشرق وسطیٰ میں تعینات ہیں ۔ایرانی ٹریپ میں نہیں آئیں گے ،اسرائیل پاکستان کو اپنے لئے خطرہ نہیں سمجھتا،حامد میرنے تجزیہ پیش کرتے ہوئے کہا حکومت کو ہمسائے میں آنے والی جنگ کے بارے میں فکر نہیں ہے ۔ ان کو یہ فکر ہے کہ پارلیمنٹ کا جو اجلاس ہونے والا ہے اس میں آئینی ترمیم کو کیسے منظور کروایا جائے۔