پاکستان کی تاریخ میں پہلی بار 35 لاکھ سے زائد ٹیکس گوشوارے جمع

اسلام آباد (رپورٹ:حنیف خالد) پاکستان کی تاریخ میں پہلی بار سالانہ آمدن ٹیکس گوشوارے جمع کرانے کی تعداد 35لاکھ سے بڑھ گئی ہے۔ ان گوشواروں کے ساتھ ٹیکس گزاروں نے 55ارب روپے سے زیادہ کا ٹیکس بھی جمع کرایا ہے۔ یہ انکشاف پیر اور منگل کی درمیانی شب چیئرمین ایف بی آر راشد محمود لنگڑیال کی زیرصدارت ہونے والے ان لینڈ ریونیو آپریشنز اور دوسرے ٹیم ممبران کے اجلاس میں کیا گیا۔ گزشتہ سال 30ستمبر تک وفاقی وزیر خزانہ محمد اورنگزیب کے مطابق 16لاکھ ٹیکس گوشوارے ایف بی آر کو موصول ہوئے تھے‘اس طرح ایف بی آر کو 2023-24ء کے سالانہ ٹیکس گوشوارے پچھلے سال کے مقابلے میں دوگنا سے بھی زیادہ جمع کرا دیئے گئے ہیں۔ آئندہ 14تاریخ تک تاریخ میں ہونے والی توسیع کی وجہ ایف بی آر کے سسٹم میں دشواریوں بھی تھیں جن کا سامنا تاجر تنظیموں‘ پاکستان بار ایسوسی ایشنوں اور عوام کو ٹیکس گوشوارے جمع کرانے میں دشواریوں کا سامنا کرنا پڑا جس کے ازالے کیلئے چیئرمین ایف بھی آر راشد محمود لنگڑیال نے وفاقی وزیر خزانہ محمد اورنگزیب کے ساتھ ون آن ون مشاورت کی اور ٹیکس گوشوارے جمع کرانے کی تاریخ میں 14دن کی توسیع کی۔