پاک چین سدا بہار دوستی دنیا کیلئے ایک مثال ہے،سپیکر قومی اسمبلی

اسلام آباد( نمائندہ خصوصی) اسپیکر قومی اسمبلی سردار ایاز صادق نے چین کے صدر شی جن پنگ، نیشنل پیپلز کانگریس کی سٹینڈنگ کمیٹی کے چیئرمین، ژاؤ لیجی اور عوام کو جمہوریہ چین کے 75 ویں یوم تاسیس کے موقع پر پاکستان کی پارلیمان اور عوام کی جانب سے مبارکباد پیش کی ہے۔ چین کی 75 یوم تاسیس کے موقع پر اپنے جاری تہنیتی پیغام میں سپیکر قومی اسمبلی نے کہا کہ پاکستان اور چین کے مابین دوطرفہ دوستانہ تعلقات باہمی اعتماد اور احترام کی مضبوط بنیادوں پر استوار ہیں۔ انہوں نے کہا کہ پاک - چین دوستی علاقائی استحکام کے مشترکہ سماجی و اقتصادی ویژن کا ثبوت ہے۔ سپیکر نے دونوں ممالک کے مابین مشترکہ اقتصادی اور بنیادی ڈھانچے کے منصوبوں پر روشنی ڈالی ۔انہوں نے کہا کہ چین پاکستان اقتصادی راہداری (سی پیک) کا ون بیلٹ ون روڈ کا فلیگ شپ منصوبہ ہے جس کی تکمیل سے خطے میں ترقی اور خوشحالی کے نئے دور کا آغاز ہو گا۔ انہوں نے کہا کہ سی پیک منصوبے کی تکمیل سے بین الاقوامی تجارت میں انقلاب برپا ہو گا جسے سے خطے کی عوام کا میعار زندگی بلند ہو گا۔