بزرگ معاشرتی ترقی میں ایک اہم کردار ادا کر سکتے ہیں،اعظم تارڑ

اسلام آباد (خبر نگار) وفاقی وزیر برائے انسانی حقوق سینیٹر اعظم نذیر تارڑ نے کہا کہ بزرگ شہریوں کا قیمتی تجربہ اور انمول بصیرت نہ صرف ہمارے معاشرے کیلئے اہم ہیں بلکہ اس قوم کو درپیش منفرد چیلنجز کو سمجھنے اور حل کرنے میں بھی بنیادی کردار ادا کرتے ہیں۔ وزارت انسانی حقوق بزرگوں کے حقوق کے تحفظ کیلئے قانونی ڈھانچے اور سماجی پالیسیوں کو مضبوط کیلئے کوشاں ہے۔ گذشتہ روز بزرگ شہریوں کے عالمی دن کے موقع پر پیغام میں انہوں نے کہا کہ آج جب ہم بزرگ شہریوں کا عالمی دن منا رہے ہیں، ہمیں یہ موقع غنیمت جانتے ہوئے اپنے بزرگوں کے حقوق اور وقار کے تحفظ کا عہد دوبارہ دہرانا چاہیے۔ آج کے پیچیدہ مسائل کو حل کرتے ہوئے ہمیں اس بات کا ادراک ہے کہ ہمارے بزرگ معاشرتی ترقی میں ایک اہم کردار ادا کر سکتے ہیں۔ مزید برآں، ان مسائل سے نمٹنے کے لیے حکومت، سول سوسائٹی اور نجی شعبے کے درمیان تعاون ضروری ہے وفاقی وزیر نے کہا کہ آئیے مل کر اپنے بزرگ شہریوں کا احترام کریں اور اس بات کو یقینی بنائیں کہ انہیں وہ عزت اور دیکھ بھال ملے جس کے وہ حقدار ہیں۔