بجلی ،گیس ٹیرف سے متعلق مسائل کے حل کیلئے ضروری اقدامات کرینگے،جام کمال

اسلام آباد(کامرس رپورٹر)وفاقی وزیر تجارت جام کمال خان نے کہا کہ حکومت مقامی صنعتوں کے فروغ اور افغانستان اور دیگر پڑوسی ممالک کے ساتھ تجارت کو بہتر بنانے پر توجہ دے رہی ہے ۔ان خیالات کا اظہار انہوں نے پیر کو سرحد چیمبر آف کامرس اینڈ انڈسٹری (ایس سی سی آئی) کے ساتھ ایک ورچوئل میٹنگ میں کیا۔ وفاقی وزیر تجارت نے کہا کہ حکومت صنعتی ترقی کو فروغ دینے اور تجارتی حجم کو بڑھانے کے مقصد سے تجارت دوست پالیسیوں کے نفاذ کو یقینی بنا رہی ہے ۔ ملاقات کے دوران ایس سی سی آئی کے صدر فواد اسحاق نے بجلی اور گیس کے بڑھتے ہوئے مسائل پر تبادلہ خیال کیا ۔انہوں نے حکومت پر زور دیا کہ وہ افغانستان کے ساتھ ٹرانزٹ ٹریڈ اور دو طرفہ تجارت سے متعلق مسائل کو حل کرے جو مقامی تاجر برادری پر منفی اثر ڈال رہے ہیں۔ایس سی سی آئی کے صدر نے کاروباری برادری کی مدد اور صنعتی توسیع کی حوصلہ افزائی کے لیے ایک نئی انڈسٹریل اسٹیٹ کے قیام کی تجویز پیش کی ۔ وفاقی وزیر نے یقین دلایا کہ وہ بجلی اورگیس ٹیرف سے متعلق مسائل کے حل کے لیے ضروری اقدامات کرینگے۔