اسرائیل کےفلسطین، شام اورلبنان پر حملے ،113 افراد شہید

تل ابیب (این این آئی)گزشتہ24 گھنٹوں کے دوران اسرائیل کی جارحیت میں غزہ میں 70فلسطینی، شام میں 3شہری جب کہ بیروت میں 40لبنانی شہید ہوگئے۔اسرائیل نے اپنی بری فوج لبنان کے جنوبی علاقے میں داخل کردیں جنھیں حزب اللہ کے جنگجووں کی جانب سے سخت مزاحمت کا سامنا ہے۔گزشتہ روز ایک دوبدو جھڑپ میں 3اسرائیلی فوجی ہلاک اور 10کے قریب زخمی ہوگئے تھے۔اسرائیلی حملوں کے جواب میں حزب اللہ نے صہیونی دارالحکومت پر ڈرونز کی بارش کردی، کئی علاقے دھماکوں سے گونج اٹھے۔ عرب میڈیا کے مطابق حزب اللہ کے تل ابیب میں ڈرون حملوں سے شہری خوف زدہ ہوکر بھاگ کھڑے ہوئے۔ بھگدڑ میں کئی افراد کچل جانے کے باعث بھی زخمی ہوگئے۔میڈیارپورٹس کے مطابق اسرائیلی فوج نے ایک ڈرون مار گرانے کا دعوی کرتے ہوئے بتایا کہ زخمی ہونے والوں کی حالت خطرے سے باہر ہے۔ کوئی بڑا مالی نقصان نہیں ہوا۔ اسرائیلی فوج نے ان ڈرونز حملوں کے جواب میں لبنان کے دارالحکومت بیروت کے رہائشی علاقے ایک عمارت پر حملہ کردیا جس میں طبی ادارے کے 6 ارکان شہید اور متعدد زخمی ہوگئے۔