یورپین یونین کی انتونیو گوتریس کیخلاف مہم کی مذمت، مکمل حمایت کا اعلان

برسلز( حافظ اُنیب راشد ) یورپین یونین نے اقوام متحدہ کے سیکرٹری جنرل انتونیو گوتریس کے خلاف چلنے والی مہم کی مذمت کرتے ہوئے ان کی مکمل حمایت کا اعلان کیا ہے۔ اس حوالے سے یورپین خارجہ امور کے سربراہ جوزپ بوریل نے کہا کہ انہوں نے دنیا میں پیدا ہونے والے ہر تنازعے کو حل کرنے کیلئے کوششیں کی ہیں۔ اس لیے ان پر امن کے حصول میں ناکامی کا الزام لگانا درست نہیں۔ یورپین یونین کا موقف بیان کرتے ہوئے جوزپ بوریل نے کہا کہ ʼ ہم اقوام متحدہ کے سیکرٹری جنرل انتونیو گوتریس کی تمام تنازعات اور بالخصوص مشرق وسطیٰ میں امن کے حصول کے لیے ان کی انتھک کوششوں کی حمایت کرتے ہیں۔ ہم ان کے خلاف بلاجواز حملوں کے ساتھ ساتھ اقوام متحدہ کے انسانی ہمدردی کے کارکنوں کی ہلاکتوں کی ناقابل قبول تعداد کی بھی مذمت کرتے ہیں۔