بحریہ یونیورسٹی کالج آف میڈیسن طبی تعلیم کا مثالی ادارہ ثابت ہو گا، نیول چیف

اسلام آباد ( رپورٹ حنیف خالد )چیف آف دی نیول اسٹاف ایڈمرل نوید اشرف نے بحریہ یونیورسٹی کالج آف میڈیسن کا افتتاح کیا۔ اس موقع پر اپنے خطاب میں انہوں نے کہا کہ یہ کالج اعلیٰ معیار کی طبی تعلیم فراہم کرنے کے لئے مثالی ادارہ ثابت ہو گا۔ نیول چیف نے مختلف شعبوں میں معیاری تعلیم فراہم کرنے میں بحریہ یونیورسٹی کی خدمات اور کامیابیوں کو سراہا۔ ریکٹر بحریہ یونیورسٹی وائس ایڈمرل (ر) آصف خالق نے مہمان خصوصی کا کیمپس کی تعمیر میں پاک بحریہ کی جانب سے فراہم کی جانے والی معاونت پر شکریہ ادا کیا۔ ایڈمرل نوید اشرف نے کیمپس میں موجود مختلف سہولیات کا بھی دورہ کیا اور جدید ترین انفراسٹرکچر کی تعریف کی ۔افتتاحی تقریب میں وزارت صحت، پاکستان میڈیکل اینڈ ڈینٹل کونسل، ایچ ای سی کے سینئر حکام، بحریہ یونیورسٹی کے سابق ریکٹرز، سول ،ملٹری حکام، فیکلٹی ممبران اور طلباء نے شرکت کی۔