میری نظر میں تاریخ کا پہلا فیصلہ جو کسی کو سنے بغیر دیا گیا، شعیب شاہین

کراچی (ٹی وی رپورٹ)جیوکے پروگرام ’’آج شاہزیب خانزادہ کے ساتھ‘‘میں گفتگو کرتے ہوئے رہنما پاکستان تحریک انصاف شعیب شاہین کا کہنا تھاکہ اس موقع پر اتنی جلد بازی میں اس طرح کا فیصلہ دینا مناسب نہیں تھا،میری نظر میں یہ تاریخ کا پہلا فیصلہ ہے جو کسی کو سنے بغیر دیا گیا، سینئر رہنما پاکستان مسلم لیگ ن رانا ثنا اللہ نے کہا کہ فیصلے کو کالعدم قرار دینے سے جوڈیشری کا وقار بلند ہوا ہے ، فیصلے سے ن لیگ کا راستہ ہموار ہونے یا نہ ہونے کی بات نہیں ہورہی ہے اس فیصلے سے تو آئین اور پارلیمنٹ کی بالادستی سامنے آئی ہے،صدر سپریم کورٹ بار ایسوسی ایشن شہزاد شوکت نے کہاکہ سپریم کورٹ پاکستان جب کوئی فیصلہ کرتی ہے تو اس فیصلے کو نہ مانے جانے کی روایت کوئی اتنی مناسب نہیں ہے، آئین نے تو ہر کسی ادارے کا دائرہ کار مقرر کیا ہوا ہے تو پھر ہر ادارے کو اپنے مقرر کردہ دائرہ کار میں رہتے ہوئے کام کرنا ہے۔ رہنما پاکستان تحریک انصاف شعیب شاہین کا کہنا تھا کہ میری نظر میں اس فیصلے کے اندر پانچ کے قریب خرابیاں ہیں پہلی بینچ کی کانسٹیٹیوشن درست نہیں ہے کیونکہ اس میں سینئر موسٹ جج منصور علی شاہ موجود نہیں جبکہ فیصلہ یہ ہوا تھاکہ یہ بینچ کام کرے گایعنی جسٹس منصور کی عدم موجودگی کا فل کورٹ میٹنگ کے تحت جواب نہیں آیا ۔دوسری خرابی یہ ہے جسٹس منیب اختر اس بینچ کا حصہ نہیں ہیں اس کے باوجود کہ انہوں نے معذرت بھی نہیں کی تھی تو لہٰذا اس موقع پر اتنی جلد بازی میں اس طرح کا فیصلہ دینا وہ مناسب نہیں تھا یعنی جسٹس منیب بینچ سے الگ نہیں ہوئے پھر بھی بینچ کا حصہ نہیں بنایا گیا ۔