بھارتی فوج نےکشمیر کے بعد چھتیس گڑھ میں بھی قیامت ڈھاڈی،36افراد ہلاک

نئی دلی (خبر ایجنسیاں) بھارتی فوج نے مقبوضہ کشمیر مظالم کی انتہا کے بعدچھتیس گڑھ میں بھی قیامت ڈھاڈی، گزشتہ روز فورسز نے ایک مبینہ آپریشن کے دوران 36 افراد کو ہلاک کردیا۔کشمیر میڈیاسروس کے مطابق ریزرو گارڑز اور سپیشل ٹاسک فورس اہلکاروں نے ریاست کے علاقے نارائن پور دنتے وواڑہ سرحد کے قریب آپریشن کے دوران 36افراد ہلاک کئے۔ فورسز نے دعویٰ کیاہے کہ ہلاک ہونے والے یہ لوگ مائو نواز علیحدگی پسند تھے ۔ پولیس ترجمان نے کہا ہے کہ انکائونٹر کے مقام سے کئی کلاشنکوف رائفلیں اور دوسرا سلحہ بھی ضبط کیا گیا ہے۔ترجمان نے کہا کہ علاقے میں فورسز کا آپریشن تاحال جاری ہے۔دوسری جانب ریاست منی پور میں علیحدگی پسند گروپوں نے سرکاری املاک پر حملے شروع کردیئے ہیں،کشیدہ حالات کے باعث علاقے کی سیکورٹی ہائی الرٹ کر دی گئی اور مزید فوجی دستے تعینات کر دیئے گئے ۔ بھارتی میڈیا کے مطابق کشیدہ حالات کے باعث علاقے کی سکیورٹی ہائی الرٹ کر دی گئی اور مزید فوجی دستے تعینات کر دیئے گئے۔منی پور میں خون ریز نسلی فسادات اور پولیس کے ساتھ مظاہرین کی جھڑپوں کے بعد کشیدہ حالات کے پیش نظر انٹرنیٹ سروس بھی بند کردیا گیا، پولیس سٹیشن پر حملے اور پولیس اہلکاروں پر تشدد کے بعد پورے علاقے کو سیل کردیا گیا جس سے اہل علاقہ گھروں میں محصور ہو گئے۔