بھارتی وزیر خارجہ کو احتجاج میں شرکت کی دعوت ملک دشمنی کا آخری لیول، عظمیٰ بخاری

لاہور ( این این آئی) وزیر اطلاعات پنجاب عظمیٰ بخاری نے کہا ہے کہ بھارتی وزیر خارجہ کو ریاست مخالف احتجاج میں شرکت کی دعوت دینا ملک دشمنی کا آخری لیول ہے،دیکھتے ہیں اسرائیلی مددگاروں کو احتجاج کی دعوت کب ملتی ہے؟ تحریک انصاف کے ڈی این اے میں پاکستان مخالف جراثیم دوڑتے ہیں، فتنہ پارٹی کے ریاست مخالف احتجاج میں افغان شہریوں کی شرکت کئی سوالات کھڑے کر رہی ہے۔انہوں نے مشیر اطلاعات خیبر پختونخوا بیرسٹر سیف کے بیان پر ردعمل کا اظہار کرتے ہوئے کہا کہ بیرسٹر سیف کا بھارتی وزیر خارجہ کو ریاست مخالف احتجاج میں شرکت کی دعوت دینا ملک دشمنی کا آخری لیول ہے،ان لوگوں میں ملکی وقار،ملکی سالمیت اور خود مختاری جیسی سوچ دور تک موجود نہیں، تحریک انصاف کے ڈی این اے میں پاکستان مخالف جراثیم دوڑتے ہیں، یہ اپنے عزائم سے ثابت کرتے ان کا مشن ملکی جڑوں کو کھوکھلا کرنا ہے۔ انہوں نے کہا کہ فتنہ پارٹی کے ریاست مخالف احتجاج میں افغان شہریوں کی شرکت کئی سوالات کھڑے کر رہی ہے، اسلام اباد سے بڑی تعداد میں فتنہ پارٹی کے احتجاج میں شریک افغان شہریوں کی گرفتاری ان کے عزائم بے نقاب کرتی ہے، اڈیالہ جیل کے قیدی نے قسم کھائی ہے پاکستان کو پرامن اورخوشحال نہیں بننے دیناہے، اس فتنے کے لیے اسرائیلی، افغانی اور بھارتی لابیاں مرے جا رہی ہیں۔ عظمیٰ بخاری نے کہا کہ پنجاب کے عوام باشعور اور عقلمند ہیں اسی لیے پنجاب کے لوگوں نے اڈیالہ جیل کے قیدی کے بیانیہ کو مسترد کر دیا ہے، خیبر پختونخوا کے عوام کے حالات قابل رحم ہیں، ان کے لیے دعا گو ہیں کہ وہ جلد اس فتنے کی حقیقت دیکھیں۔