اسلام آباد کی سیکورٹی ، سندھ پولیس کے ایک ہزار اہلکار روانہ

کراچی ( اسٹاف رپورٹر )اسلام آباد میں سیکورٹی کے لیے سندھ پولیس کے ایک ہزار اہلکار اسلام آباد روانہ ہو گئے۔کراچی سے اسلام آباد کیلئے سندھ پولیس کے اہلکار اسپیشل ٹرین کے ذریعے روانہ کئیے گئے ۔اے آئی جی آپریشن اظہر مغل کے مطابق ایک ہزار کے قریب پولیس اہلکاروں کو اسپیشل ٹرین کے ذریعے اسلام آباد روانہ کیا گیاہے۔ اسپیشل ٹرین 16 کوچز پر مشتمل ہے۔سندھ کے مختلف شہروں میں صورتحال کنٹرول میں ہے ۔ انہوں نے بتایا کہ وفاق کی جانب سے اسلام آباد میں نفری طلب کی گئی تھی جس پر نفری وہاں بھیجی گئی ہے۔انہوں نے بتایا کہ نفری شنگھائی تعاون تنظیم کے اجلاس کے دوران سیکورٹی کے لیے بھیجی گئی ہے ۔دوسری جانب ذرائع کا کہنا ہے کہ پی ٹی آئی کے احتجاج اور اسلام آباد میں جاری کشیدگی کو کنٹرول کرنے کے لئے نفری بھیجی گئی ہے۔