آرڈی اے کا ہائیکورٹ روڈ کو دو رویہ ماڈل سڑک بنانے کا فیصلہ

اسلام آباد (ساجد چوہدری )راولپنڈی ڈویلپمنٹ اتھارٹی (آرڈی اے )نے ہائیکورٹ روڈ(چوہدری بوستان روڈ )کو ماڈل سڑک بنانے کا فیصلہ کیا ہے۔سکیم تھری ڈھوک چوہدریاں سے جی ٹی روڈ ( سواں پل )تک اس سڑک کو دو رویہ کیاجائے گا ۔سڑک کے گرد تجاوزات کا خاتمہ کیا جائے گا اور خالی جگہوں پر گرین بیلٹس بھی بنائی جائیں گی۔ ڈائریکٹر جنرل آرڈی اے کنزہ مرتضیٰ کا اس حوالے سے کہنا تھا کہ روات کی طرف سے آنیوالی ٹریفک جس نے راول روڈ یا پھر اسلام آباد کی طرف جانا ہوگا وہ ہائیکورٹ روڈ بھی استعمال کر سکے گی۔ اس طرح اسلا م آباد یا راول روڈ کی طرف سے آکر روات کو جانے والے بھی اس راستے کا استعمال کر سکیں گے ۔ اس سڑک کی بہتری و کشادگی سے کچہری چوک پر ٹریفک کا رش کم ہو جائے گا ۔ انجینئرنگ برانچ کو ہائیکورٹ روڈ کو ماڈل روڈ کیلئے فائل ورک کا ٹاسک دیدیا گیا ہے ۔