صحت کے معاملے میں غفلت برداشت نہیں کی جا سکتی ،مریم نواز

لاہور(صباح نیوز) وزیرِ اعلیٰ پنجاب مریم نواز نے کہا ہے کہ صحت کا معاملہ انسانی زندگی کا معاملہ ہے جس میں غفلت برداشت نہیں کی جا سکتی، پنجاب کے ہر ہسپتال کو بہتر سے بہترین کرنا چاہتے ہیں، کرسی ذمہ داریوں کا بوجھ ہے، ایک اچھے فیصلے سے کروڑوں زندگیوں میں بہتری آ رہی ہے ۔وزیرِ اعلیٰ پنجاب مریم نواز نے لاہور کے علاقے جوبلی ٹائون میں نجی ہسپتا ل میں نیو ایمرجنسی بلاک کا افتتاح کر دیا۔ اس موقع پر گفتگو کرتے ہوئے انہوں نے کہا کہ صحت کا معاملہ انسانی زندگی کا معاملہ ہے جس میں غفلت برداشت نہیں کی جا سکتی۔ ایئر ایمبولینس سے روز قیمتی جانیں بچانے میں قابلِ قدر کامیابی حاصل کر رہے ہیں۔انہوں نے کہا کہ کرسی ذمہ داریوں کا بوجھ ہے، ایک اچھے فیصلے سے کروڑوں زندگیوں میں بہتری آ رہی ہے، پنجاب کے ہسپتا لوں میں 90 فیصد تک مفت ادویات فراہم کی جا رہی ہیں۔وزیرِ اعلیٰ پنجاب نے کہا کہ ہارٹ اور بون میرو ٹرانسپلانٹ کے لئے ہسپتا ل سے اشتراک کریں گے،پنجاب میں پورے پاکستان سے علاج کے لئے مریض آتے ہیں۔