پنجاب:سیکورٹی خطرات کے باعث5اضلاع میں دفعہ 144نافذ

لاہور ( آن لائن ) سیکورٹی خطرات کے پیش نظر پنجاب کے5اضلاع میں فوری طور پر دفعہ144نافذ کر دی گئی۔حکومت پنجاب نے5اضلاع ڈی جی خان، لیہ، مظفر گڑھ، راجن پور اور کوٹ ادو میں3دن کے لئے دفعہ144نافذ کی ہے اس دوران سیاسی اجتماعات، دھرنے ، جلسے، احتجاج اور ایسی تمام سرگرمیوں پر پابندی ہو گی۔پابندی کا اطلاق ہفتہ12اکتوبر سے سوموار14اکتوبر تک ہو گا۔ ترجمان محکمہ داخلہ پنجاب کے مطابق دفعہ144کے نفاذ کا فیصلہ متعلقہ ضلعی انتظامیہ کی درخواست پر کیا گیا۔ سکیورٹی خطرات کے پیش نظر کوئی بھی عوامی اجتماع دہشت گردوں کیلئے سافٹ ٹارگٹ ہو سکتا ہے، امن و امان کے قیام، انسانی جانوں اور املاک کے تحفظ کیلئے احکامات جاری کیے گئے ،محکمہ داخلہ نے ڈی جی خان، لیہ، مظفرگڑھ، راجن پور اور کوٹ ادو میں دفعہ 144 کے نفاذ کا نوٹیفکیشن جاری کر دیا۔