لاہور زیادتی واقعہ:ہاتھ جوڑ کر کہتی ہوں کسی بچی کا پردہ رہنے دیں،عظمیٰ بخاری

لاہور (آئی این پی) وزیر اطلاعات پنجاب عظمیٰ بخاری لاہور زیادتی واقعہ پر کہاکہ ہاتھ جوڑ کر کہتی ہوں کسی بچی کا پردہ رہنے دیں، اگر والدین بات نہیں کرنا چاہتے تو ہائوس یا سوشل میڈیا پر تماشا نہ بنائیں،بچی سامنے آجائیں توکارروائی کے لیے تیار ہیں۔صوبائی اسمبلی میں خطاب کے دوران انہوں نے کہاکہ ریپ واقعے پر گندی اور گھنائونی سازش ہو رہی ہے، یہ لوگ ریپ کا نام اتنی آسانی سے لیتے ہیں کیا یہ کوئی مذاق ہے،بچیوں پر جھوٹے الزام لگا رہے ہیں، ان بچیوں نے بعد میں اس معاشرے میں جینا ہے۔انہوں نے کہا کہ سوشل میڈیا پر خبریں چلنے کے بعد بچیوں نے احتجاج کیا، جو نام بتایا گیا اس نام کی تین بچیاں تھیں اور تینوں سے معلوم کیا گیا لیکن ان کے ساتھ ایسا کوئی واقعہ نہیں ہوا، پھر جس گارڈ کا نام لیا اسے بھی گرفتار کر لیا گیا، جس ہسپتال کا کہا گیا وہاں جا کر سارا ریکارڈچیک کیاگیا،وہاں بھی ایسا کچھ نہیں ہے۔سیاسی مخالفین نے اپنے سکولوں سے چند بچے جمع کرکے احتجاج کروا رہے ہیں، بغیر ثبوت کے کیمپس سیل کر دیا گیا۔وزیر اطلاعات کی گفتگو کے دوران اپوزیشن بنچوں سے ہنگامہ آرائی کی گئی، ڈپٹی سپیکر پنجاب اسمبلی دونوں فریقوں کو خاموش کرانے میں ناکام رہے۔ عظمیٰ بخاری کا کہنا تھا کہ میں نے ان کو سیاسی گدھ کہا ان کو برا لگ رہا ہے۔