کوئٹہ(اسٹاف رپورٹر)بلوچستان ہائی کو رٹ کے جسٹس عبداللہ بلوچ اور جسٹس اقبال احمد کاسی پر مشتمل بینچ نے امپورٹ اور ایکسپورٹ کے مال سے لدی گاڑیوں کو چیک پوسٹوں کو کسٹم اہلکاروں کی جانب بلاجواز روکے جانے سے متعلق دائر آ ئینی درخواست کی سماعت کی،سماعت کے دوران ڈائریکٹر کسٹم انٹیلی جنس بلوچستان کے پیش نہ ہونے پر عدالت نے برہمی کا اظہار کرتے ہوئے انہیں شوکاز نوٹس جاری کیا،عدالت نے سیکرٹری وزارت داخلہ اور چیئرمین ایف بی آر کو ہدایت کی کہ ایک ہفتے کے دوران درخواست گزار امپورٹرز اور ایکسپورٹرز اور رکن چیمبرآف کامرس اینڈ انڈسٹری کوئٹہ بلو چستان کے ساتھ ایک اجلاس منعقد کر کے اس کی پیش رفت رپورٹ اگلی سما عت پر عدالت میں پیش کریں۔عدالت نے یہ شوکاز نوٹس اور احکامات آل پاکستان ڈرائی فروٹس امپورٹرز اینڈ ایکسپورٹرز ایسوسی ایشن کی جانب سے دائر آئینی درخواست کی سما عت کے دوران دیئے۔سماعت کے دوران عدالت نےکہاکہ مشاہدے میں آیا ہےکہ اجتماعی طو ر پر سب بلوچستان کے امپورٹرز اور ایکسپورٹرز کے مسائل حل کرنے پرمتفق ہیں۔ تاہم نگرانی اور رابطہ کے فقدان کی وجہ سے ایسے مسائل پیدا ہوئے ہیں۔ عدالت نے سیکرٹری وزارت داخلہ اور چیئرمین ایف بی آر کو حکم دیاکہ کہ وہ ایک ہفتے کے اندر تمام متعلقہ حکام اور درخواست گزار امپورٹرز اور ایکسپورٹرز اور رکن چیمبر آف کامرس اینڈ انڈسٹری کوئٹہ کے ساتھ اجلاس منعقد کریں اور تمام متعلقہ افراد کو مکمل اور منصفانہ موقع فراہم کریں۔اور امپورٹرز و ایکسپورٹرز کو درپیش مسائل مشکلات کے حل کیلئے اقدامات اٹھائے جائیں۔ اور اس سلسلے میں امپورٹرز اور ایکسپورٹرز ،گڈز فارورڈنگ ایجنسیوں کو نقصان نہ پہنچایا جائے کیونکہ وہ کسٹم ڈیوٹی، سیل ٹیکس/انکم ٹیکس کی مد میں بھاری رقم قومی خزانے کو ادا کر رہے ہیں۔ اجلاس کی پیش رفت رپورٹ آئندہ سماعت پر جمع کرائی جائے۔عدالت نے کہاکہ بینچ کی جا نب سے یکم اکتوبر کو دئیے گئے حکم کی تعمیل میں علی محمود، اسپیشل سیکرٹری داخلہ ایڈیشنل اٹارنی جنرل اور ڈی اے جی ، جمیل بلوچ، کلکٹر اپریزمنٹ کوئٹہ اور ڈپٹی کلکٹر ایف بی آر اپنے وکیل کے ہمراہ پیش ہو ئے، سما عت کے دوران نجم الدین مینگل ایڈیشنل اٹارنی جنرل اور نصیر احمد بنگلزئی ڈپٹی اٹارنی جنرل نے سیکرٹری داخلہ کی پیشی سے استثنی کی درخواست پیش کی اور عدالت کو بتایاکہ وہ 15، 16اور 17اکتوبر 2024کو اسلام آباد میں ہونے والی شنگھائی تعاون تنظیم کانفرنس میں مصروفیت کے با عث پیش نہیں ہو سکے ہیں۔ ڈائریکٹر کسٹم انٹیلی جنس بلوچستان عدالت میں پیش نہیں ہوئے۔جس پر عدالت نے ڈائریکٹر کسٹم انٹیلی جنس بلوچستان کو شوکاز نوٹس جاری کرتے انہیں اگلی سماعت پر ذاتی طور پر پیش ہونے ہدایت کی، سماعت کے دوران درخواست گذار کی جانب سے عدنان اعجاز ایڈووکیٹ پیش ہوئے جبکہ حکومت پاکستان کی جانب سے کیس کی پیروی نجم الدین مینگل، ایڈیشنل اٹارنی جنرل اور نصیر احمد بنگلزئی ڈپٹی اٹارنی جنرل نے کی۔ معزز بینچ نے سیکرٹری وزارت داخلہ اور سپیشل سیکرٹری وزارت داخلہ، چیئرمین ایف بی آر، چیف کلکٹر اور کسٹمز کے تمام متعلقہ کلکٹرز یعنی انٹیلی جنس، انفورسمنٹ اور اپریزمنٹ اینڈ ویلیویشن تمام موجود معاون عملہ کے ساتھ آئندہ سماعت پر پیش ہونے کی ہدایت کی۔ بعد ازاں درخواست کی سماعت31اکتوبر تک کے لئے ملتوی کردی گئی۔