کیپیٹل پولیس پارلیمنٹ لاجز پہنچ گئی، اختر مینگل کے فلیٹ کی تلاشی

اسلام آباد(نمائندہ جنگ) بلوچستان نیشنل پارٹی کے سربراہ اختر مینگل نے کہا ہے کہ بی این پی کے 2 سینیٹرز اور ان کے خاندانوں کو مسلسل ہراساں کیا جا رہا ہے۔ اب میرے پاس ایک ہی آپشن بچا ہے کہ اپنے سینیٹرز کو مستعفی ہونے کی ہدایت کر دوں۔ کیپیٹل پولیس بدھ کی رات بلوچ سردار اختر مینگل کے پارلیمنٹ لاجز فلیٹ پر تلاشی کے لیے پہنچ گئی ، بی این پی کے قائم مقام صدر ساجد ترین لاجز میں موجود تھے انہوں نے بتایا کہ ہمارے دو سینیٹر اسلام آباد میں ہیں جومجوزہ آئینی ترمیم کے خلاف ووٹ ڈالیں گے،انہوں نے پولیس سے چھاپے کی وجہ معلوم کی تو بتایا گیا کہ یہ جاننے کے لیے آئے ہیں کہ یہاں کتنے پارلیمنٹیرینز موجود ہیں؟ اس ضمن میں کیپیٹل پولیس نے چھاپے کی تردید کرتے ہوئے کہا کہ ساجد ترین نے شکایت کی تھی کہ کوئی نامعلوم شخص ان کا تعاقب کر رہا ہے پولیس اس شکایت کے حوالے سے مزید معلومات کے لیے پارلیمنٹ لاجز گئی تھی مگر اس کو غلط رنگ دیا گیا جس پر افسوس ہے ۔