سموگ ، سیاسی نہیں انسانی مسئلہ، معاملے پر بھارت سے بات کرنا ہوگی، وزیر اعلیٰ پنجاب

لاہور (آئی این پی )وزیراعلی ٰپنجاب مریم نواز شریف نے کہا ہے کہ سموگ سیاسی نہیں انسانی مسئلہ ہے، اس معاملے پر بھارت سے بات کرنا ہوگی، ہوائوں کونہیں پتا کہ دونوں ملکوں کے درمیان میں بارڈر ہے، جب تک دونوں پنجاب مل کر اقدامات نہیں کرتے سموگ سے لڑنا ممکن نہیں ،سوچ رہی ہوں سموگ کے حوالے سے بھارتی پنجاب کے وزیر اعلیٰ کو خط لکھوں۔ ان خیالات کا اظہار انہوں نے لاہور میں دیوالی کی تقریب سے خطاب کرتے ہوئے کیا۔ تقریب کو روشن دیوں اور روایتی رنگولی سے سجایا گیا۔ وزیر اعلیٰ نے1400 ہندو خاندانوں میں تحفتا 15،15ہزار روپے کے چیک تقسیم کئے۔تقریب میں امریکہ ، برطانیہ اور دیگر ممالک کے سفارت کاروں نے خصوصی شرکت کی۔ اس موقع پر خطاب کرتے ہوئے مریم نواز شریف کا کہنا تھا سموگ کے مسئلے پر بھارت سے ڈپلومیسی کی ضرورت ہے، بھارتی اور پاکستانی پنجاب کو مل کر سموگ کے مسئلے کا حل نکالنا ہوگا۔انہوں نے کہا کہ ہواں کو نہیں پتا دونوں ملکوں کے درمیان میں بارڈر ہے، جب تک دونوں پنجاب مل کر اقدامات نہیں کرتے سموگ سے لڑنا نا ممکن ہے۔وزیراعلی ٰپنجاب کا کہنا تھا کہ اقلیتوں کا تحفظ ہماری اولین ترجیح ہے، سکھ، ہندو اور مسیحی سب برابر کے پاکستانی ہیں، دیوالی کی تقریب میں ہندو برادری کو خوش آمدید کہتی ہوں، یہ دلوں کو قریب لانے کا چراغ ہے، ہم سب کسی تفریق کے بغیر پاکستانی ہیں۔اس موقع پر مریم نواز نے 20 دسمبر کو مینارٹی کارڈ متعارف کرنے کا اعلان کیا اور کہا کہ مستحق اقلیتی افراد کو مینارٹی کارڈ کے ذریعے 10 ہزار 500 روپے دیئے جائیں گے۔