بنوں، فورسز کی کارروائی، 8 خوارج ہلاک، میجر سمیت 3 جوان شہید

کراچی (نیوز ڈیسک) بنوں میں سکیورٹی فورسز کی کارروائی میں 8 خوارج ہلاک ہوگئے جبکہ دہشتگردوں سے فائرنگ کے تبادلے میں میجر عاطف خلیل سمیت 3 جوان بہادری سے لڑتے ہوئے شہید ہوگئے۔ پاک فوج کے شعبہ تعلقات عامہ (آئی ایس پی آر) کے مطابق بنوں کے علاقے بکا خیل میں سکیورٹی فورسز نے خوارج کی موجودگی کی خفیہ اطلاعات پر آپریشن کیا۔سکیورٹی فورسز کے آپریشن میں 8 خوارج جہنم واصل، 7 زخمی ہوگئے۔ دہشت گردوں سے شدید فائرنگ کے تبادلے میں میجر عاطف خلیل 2 جوانوں سمیت بہادری سے لڑتے شہید ہوگئے، شہید جوانوں میں نائیک آزاد اللہ اور لانس نائیک غضنفر عباس شامل ہیں۔ شہید میجر عاطف خلیل کا تعلق آزاد کشمیر کے علاقے سدھنوتی سے تھا، شہید نائیک آزاد اللہ کرک اور لانس نائیک غضنفر عباس شہید لیہ کے رہائشی تھے۔