اسلام آباد(جنگ نیوز) عالمی مالیاتی ادارے (آئی ایم ایف) نے ٹیکس اہداف میں ناکامی پر حکومت پاکستان سے منی بجٹ کا مطالبہ کردیا،ایف بی آر ذرائع کے مطابق آئی ایم ایف نے ٹیکس اہداف میں ناکامی پر شارٹ فال پورا کرنے کے لیے منی بجٹ کا مطالبہ کیا ہے۔ذرائع کا کہنا ہےکہ ورچوئل بات چیت کے دوران ایف بی آر کی ٹیکس اہداف پر نظرثانی کی درخواست بھی مسترد کردی گئی ہے۔ایف بی آر ذرائع نے بتایا کہ ٹیکس شارٹ فال کے باعث دوسری قسط میں مشکلات کا سامنا کرنا پڑسکتا ہے اور آئندہ مہینوں کے شارٹ فال کا تخمینہ لگا کر 500 ارب کا منی بجٹ آسکتا ہے۔ واضح رہے کہ عالمی مالیاتی فنڈ قرض لینے والے ممالک کی معیشت اور آمدنی کے ذرائع کی مسلسل مانیٹرنگ کرتا ہے اور حکومت پاکستان سے یہ مطالبہ بھی اسی سلسلے کی کڑی ہے۔