آئین آزادی اظہار رائے اور معلومات تک رسائی کا حق دیتا ہے، یوسف رضا گیلانی

اسلام آباد (اے پی پی) قائم مقام صدر سید یوسف رضا گیلانی نے کہا ہے کہ پاکستان میں جمہوریت کے استحکام اور شفافیت کے فروغ کیلئے آزادی صحافت ناگزیر ہے ،پاکستان آزادی صحافت اور اظہار رائے کی آزادی پر پختہ یقین رکھتا ہے، پاکستان کا آئین آزادی اظہار رائے و صحافت اور معلومات تک رسائی کا حق دیتا ہے ۔ صحافیوں کے خلاف جرائم پر استثنیٰ کے خاتمے کے عالمی دن پر اپنے خصوصی بیان میں انہوں نے کہاہے کہ صحافیوں کا تحفظ کئے بغیر آزادی ِصحافت کا تحفظ ممکن نہیں، صحافی مشکل حالات بالخصوص تنازعات اور جنگوں کے دوران رپورٹنگ کرتے ہیں،پُرخطر حالات اور دوران جنگ صحافیوں کو مختلف خطرات کا سامنا کرنا پڑتا ہے ۔ قائم مقام صدر نے کہا کہ صحافیوں کو سنسرشپ ، تشدد ، دھمکیوں ،اغواء اور قتل جیسے خطرات درپیش ہیں۔ انہوں نے کہا کہ جنگ زدہ علاقوں بالخصوص غزہ میں اسرائیلی بمباری کے نتیجہ میں بڑی تعداد میں صحافی قتل ہوئے ، اقوام متحدہ کے مطابق غزہ میں اب تک 130 سے زائد صحافی مارے جا چکے ہیں ، اسرائیل نے میڈیا کے اداروں اور صحافیوں کو بڑے پیمانے پر نشانہ بنایا۔ انہوں نے زور دیا کہ عالمی برادری اسرائیل کو صحافیوں کے خلاف جرائم پر جوابدہ ٹھہرائے ۔ انہوں نے کہا کہ پاکستان میں صحافیوں اور میڈیا ورکرز کے تحفظ کیلئے اقدامات کیے گئے ہیں، آئین پاکستان آزادی اظہارِ رائے، آزادی صحافت اور معلومات تک رسائی کا حق دیتا ہے ، پاکستان آزادی صحافت اور اظہارِ رائے کی آزادی پر پختہ یقین رکھتا ہے۔قائم مقام صدر نے کہا کہ پاکستان میں جمہوریت کے استحکام ، شفافیت کے فروغ کیلئے آزادی صحافت ناگزیر ہے ،صحافیوں کے خلاف تشدد کے واقعات سے جمہوریت کمزور ہوتی ہے ۔انہوں نے کہا کہ پاکستان نے صحافیوں کے تحفظ کیلئے صحافیوں اور میڈیا ورکرز کے تحفظ کا ایکٹ 2021 پاس کیا،پاکستان میں صحافیوں کیلئے ہیلتھ انشورنس متعارف کرائی گئی ہے تاہم ملک میں صحافیوں اور میڈیا ورکرز کے تحفظ کیلئے ابھی مزید اقدامات کرنا ہوں گے ۔انہوں نے کہا کہ صحافیوں کے تحفظ کیلئے مربوط حکمتِ عملی اور جامع نظام اپنانے کی ضرورت ہے ۔