32 ارب روپے کے سیلز ٹیکس ریفنڈز کی ادائیگی اہم قدم ،خرم مختار

فیصل آباد (نمائندہ جنگ) پاکستان ٹیکسٹائل ایکسپورٹرز ایسوسی ایشن کے پیٹرن چیف خرم مختار نے حکومت کی طرف سے برآمد کنندگان کو زیرالتواء سیلز ٹیکس ریفنڈز کی مد میں 32 ارب روپے کی ادائیگی کا خیر مقدم کیا ہے۔ انہوں نے کہا ہے کہ یہ رقم 30 ستمبر تک کے ریفنڈ پیمنٹ آرڈرز کیلئے جاری کی گئی ہے جو کہ ٹیکسٹائل ایکسپورٹرز کو درپیش مسائل کے حل کی طرف ایک اہم قدم ہے، حکومت کے اس اقدام سے جہاں ایکسپورٹرز کا اعتماد بحال ہو گا، وہیں برآمدات کے فروغ میں بھی مدد ملے گی، برآمد کنندگان کو درپیش سرمائے کی قلت اور ٹیکس سے متعلق دیگر مسائل حل کرکے برآمدات کو 25 فیصد تک بڑھایا جا سکتا ہے۔ انہوں نے کہا کہ برآمد کنندگان کو ڈبل انکم ٹیکس کی پیشگی ادائیگی اور جنرل سیلز ٹیکس (جی ایس ٹی) کے نظام میں پیچیدگیوں کی وجہ سے شدید مالی مشکلات کا سامنا ہے،برآمد کنندگان کا سرمایہ ریفنڈز کی ادائیگی میں پھنسا ہوا ہے جبکہ مقامی خریداری پر ایکسپورٹ فیسیلیٹیشن سکیم (EFS) کے خاتمے کے بعد صورتحال مزید گھمبیر ہو گئی ہے۔ انہوں نے حکومت پر زور دیا کہ برآمد کنندگان کو درپیش مسائل فوری حل کئے جائیں تاکہ عالمی منڈی میں موجود مواقع سے فائدہ اٹھا کر برآمدات بڑھائی جا سکیں۔