مقبوضہ کشمیر میں بھارتی فوج کا فوجی آپریشن ، مزید 3 کشمیری نوجوان شہید، متعددافراد گرفتار

سری نگر(ایجنسیاں )مقبوضہ کشمیر میں ہفتہ کوقابض بھارتی فوج نے وادی کشمیرکے وسیع علاقوں کا محاصرہ کرکے فوجی آپریشن شروع کردیا ہے جنوبی کشمیر میں ریاستی دہشت گردی کی تازہ کارروائی کے دوران بھارتی فوج نےگزشتہ روز دو کشمیری نوجوانوں کو ضلع اسلام آباد کے علاقے ہلکان گلی میں محاصرے اور تلاشی کی ایک کارروائی کے دوران ایک جعلی مقابلے میں شہید کیاسرینگر سمیت کئی علاقوں میں قابض بھارتی فوج کا تلاشی آپریشن جاری ہے ، بھارتی فوج نے دعوی کیا ہے کہ دو مجاہدین کوایک جھڑپ کے دوران شہید کیا گیا ، آخری اطلاعات تک علاقے میں بھارتی فوج کا آپریشن جاری تھا۔شمالی کشمیر ، ضلع بانڈی پورہ کے علاقے پاناراور سری نگر میں بھی محاصرے اور تلاشی کی کارروائی شروع کر دی ہے۔ پیرا ملٹری ا ور پولیس اہلکاروں نے صبح سویرے سری نگر کے علاقے خانیار کو گھیرے میں لیکر تلاشی کی کارروائی شروع کی۔ آخری اطلاعات تک آپریشن جاری تھا۔تلاشی کارروائیوں میں کئی افراد کو گرفتار کیا گیا ہے۔ علاوہ ازیں ضلع اسلام آباد کے علاقے کھنہ بل کی جامع مسجد میں آگ بھڑک اٹھی ۔جامع مسجد کھنہ بل میں لگنے والی آگ قریبی رہائشی مکانات تک پھیل گئی جس سے متعدد مکانوں کو نقصان پہنچا۔۔محکمہ فائربریگیڈ کے عملے نے پہنچ کر آگ پر قابو پایا۔ سرینگر کے بربر شاہ علاقے میں ایک شخص کی پراسرار طورپرلاش برآمد ہوئی ہے ۔ پولیس کے ایک اہلکار نے میڈیا کو بتایا ہے کہ بربر شاہ کے رہائشی ایک شخص کی لاش اسکے گھر میں لٹکی ہوئی پائی گئی ہے ۔پولیس نے جائے وقوعہ پر پہنچ کر لاش کو تحویل میں لے لیاہے۔