حکومت پنجاب کا پنجاب ائیر کے نام سے ایئر لائن شروع کرنے کا فیصلہ ، فربیلٹی پر بھی کام شروع

لاہور ( خبر ایجنسی) حکومت پنجاب نے پنجاب ایئر کے نام سے ایئرلائن شروع کرنے کا فیصلہ کرلیا۔ذرائع کے مطابق صوبائی حکومت نے پنجاب ایئرلائن کی فزیبیلٹی پرکام شروع کردیا ہے۔ ذرائع کا کہنا ہےکہ پنجاب ایئرلائن پرائیویٹ سرمایہ کاروں کے اشتراک سے لائی جائے گی اور ایئرلائن میں حکومت پنجاب کے شیئرز بھی ہوں گے۔ دوسری جانب پنجاب کی سینئر وزیر مریم اورنگزیب نے پی آئی اے خریدنے کی خبروں کی تردید کی اور کہا کہ حکومت پنجاب پی آئی اے نہیں خرید رہی، جھوٹی خبر پھیلائی جا رہی ہے ۔ واضح رہے کہ گزشتہ روز نواز شریف نے امریکا میں صحافیوں سے گفتگو میں کہا تھا کہ وزیر اعلیٰ پنجاب مریم نواز پی آئی اے کی خریداری سے متعلق غور کر رہی ہیں، مریم نواز نے اس سلسلے میں اُن سے صلاح مشورہ بھی کیا ہے۔ مریم نےکہا ہے کہ اُس ایئرلائن کا نام ایئر پنجاب رکھا جاسکتا ہے۔نواز شریف کا کہنا تھا کہ انہوں نے مریم نواز سےکہا ہےکہ آپ پی آئی اے کو خرید بھی سکتی ہیں اور نئی ایئرلائن بھی بنا سکتی ہیں۔امریکا سے لندن واپس پہنچنے پرمیڈیا سےگفتگو میں نواز شریف کا کہنا تھا کہ انہوں نے پنجاب حکومت کی جانب سے پی آئی اے خریداری پر غور کی جو بات کی، اس پر مزید کام کا ارادہ ہے، ا گر ایسا ہو جائے تو ملک کو ایک اچھی ایئر لائن میسر آئےگی۔