اینٹی بائیوٹک کا استعمال، پاکستان دنیا میں تیسرےنمبر پر، آکسفورڈ تحقیق

کراچی (رفیق مانگٹ) آکسفورڈ یونیورسٹی پریس کی رپورٹ کے مطابق دنیا کے ستر سے زائد ممالک میں ہونے والی تحقیق میں اینٹی بائیوٹک ادویات کے استعمال میں اضافے کے حوالے سے پاکستان چین اور بھارت کے بعد تیسرے نمبر پر ہے۔ تحقیق کے مطابق پاکستان دنیا کے ان پانچ ممالک میں شامل ہے جہاں 2019 کے دوران ’اینٹی بیکٹیریا مزاحمت‘ کی وجہ سے سب سے زیادہ اموات ہوئیں۔نیشنل انسٹیٹیوٹ آف ہیلتھ کے مطابق پاکستان میں ہر سال ہونے والی 25 فیصد اموات کی وجہ اینٹی بائیوٹکس کا غیر ضروری استعمال ہے۔پاکستان میں اموات کی تیسری سب سے بڑی وجہ اینٹی بائیوٹک ادویات ہیں جس کی وجہ سے ہر سال سات لاکھ افراد جان سے ہاتھ دھو بیٹھتے ہیں۔ 97فیصد فارمیسی بغیر نسخے کے اینٹی بائیوٹکس فروخت کر رہے ہیں۔