سالانہ پائیدار ترقی کانفرنس آج اسلام آباد میں ،عالمی ماہرین شرکت کرینگے

اسلام آباد (کامرس رپورٹر) تھنک ٹینک ایس ڈی پی آئی کی 27ویں سالانہ پائیدار ترقی کانفرنس (ایس ڈی سی) آج 4 نومبر سے 7 نومبر 2024 تک اسلام آباد میں منعقد ہوگی، جس میں عالمی اور علاقائی ماہرین شرکت کریں گے۔ یہ کانفرنس انسانی بہتری کے لئے درپیش عالمی مسائل کا حل تلاش کرنے اور مشترکہ حکمت عملی وضع کرنے کے لئے پلیٹ فارم فراہم کرے گی۔ اس سال کی کانفرنس کا موضوع ’’نازک حالات سے پائیدار ترقی کی طرف سفر‘‘ ہے، جو ایس ڈی پی آئی کے عالمی چیلنجز سے نمٹنے اور موثر و مضبوط حکمت عملیوں کے فروغ کے عزم کو ظاہر کرتا ہے۔ کانفرنس کے افتتاحی اجلاسوں میں قائم مقام صدر و چیئرمین سینیٹ سید یوسف رضا گیلانی، وزیرِاعظم کی معاون برائے موسمیاتی تبدیلی و ماحولیاتی ہم آہنگی رومینہ خورشید عالم، سینیٹر شیری رحمان اور سپریم کورٹ کے سینئر جج جسٹس سید منصور علی شاہ شرکت کریں گے۔ ایس ڈی سی تحقیق کاروں، پالیسی سازوں، عملی ماہرین اور عالمی سطح کے ماہرینِ تعلیم کے لئے ایک منفرد فورم فراہم کرتا ہے جہاں وہ پائیدار ترقی کے موضوع پر بامعنی مکالمے میں شریک ہوں اور اپنی تحقیقی کاوشیں پیش کریں۔ کانفرنس کے ساتھ پائیدار سرمایہ کاری ایکسپو 2024 کا دوسرا ایڈیشن بھی منعقد ہو رہا ہے، جس کا موضوع ’’موسمیاتی لچک کے لیے جدید حل‘‘ ہے۔ یہ مشترکہ تقریب موسمیاتی و سماجی-معاشی چیلنجز سے نمٹنے کے لئے باہمی تعاون اور جدت کو فروغ دینے کےبعزم کا اظہار ہے۔