انسداد دہشتگردی ترمیمی بل 2024 بنیادی حقوق کی خلاف ورزی ہے، رضا ربانی

اسلام آباد (نامہ نگار خصوصی) سابق چیئرمین سینٹ میاں رضا ربانی نے کہا ہے کہ انسداد دہشتگردی ترمیمی بل 2024 کا قومی اسمبلی میں پیش کیا جانا بنیادی حقوق کی خلاف ورزی ہے، بل کے تحت حکومت اور سول آرمڈ فورسز کو 3 ماہ تک حراست میں رکھنے کا اختیار دیا جارہا ہے۔ ایک بیان میں رضا ربانی نے کہا کہ یہ بل آئین میں دی گئی بنیادی حقوق کی خلاف ورزی ہے۔ رضا ربانی نے کہا کہ دہشتگردی کی سرگرمیوں میں اضافہ ہوا ہے، حکومت کو یہ جواب دینا ہوگا کہ وہ کیوں ناکام رہی ہے۔ انہوں نے مطالبہ کیا کہ پارلیمنٹ کے ان کیمرا اجلاس میں دہشتگردی کے حوالے سے تفصیلی بریفنگ دی جائے۔ رضا ربانی نے مزید کہا کہ نئی مجوزہ ترمیم حکومت اور مسلح افواج کو کسی فرد کو 90 دن کے لئے حراست میں رکھنے کا اختیار دیتی ہے، اس حراست کو3 ماہ کی اضافی مدت کیلئے بڑھایا جاسکتا ہے، یہ آئین کے آرٹیکل 10 کی خلاف ورزی ہے۔