پاکستان کا دو رُکنی پارلیمانی وفد ایشین پارلیمنٹری اسمبلی کے اجلاس میں شرکت کیلئے آج دوحا روانہ ہوگا

اسلام آباد (خصوصی نامہ نگار) پاکستان کا دو رُکنی پارلیمانی وفد، ایشین پارلیمنٹری اسمبلی کے دو روزہ اجلاس میں شرکت کے لئے پیر کی صبح قطر کے دارالحکومت دوحا روانہ ہوگا۔ وفد کی قیادت سینیٹ میں پاکستان مسلم لیگ (ن) کے پارلیمانی پارٹی لیڈر اور قائمہ کمیٹی امور خارجہ کے چیئرمین سینیٹر عرفان صدیقی کریں گے جبکہ پاکستان پیپلز پارٹی کے رُکن قومی اسبملی مرزا اختیار بیگ بھی وفد میں شامل ہوں گے۔ ایشین پارلیمنٹری اسمبلی کی قائمہ کمیٹی برائے بجٹ اور پلاننگ کا یہ اجلاس 4 نومبر سے 7 نومبر تک جاری رہے گا۔ اس اجلاس میں پارلیمنٹری اسمبلی کے بجٹ اور پلاننگ سے متعلق دو نکاتی ایجنڈے پر غور کیا جائے گا۔ پاکستان، چین، روس، بھارت، سعودی عرب، ایران، عراق ، ملائیشیا، انڈونیشیا، ترکیہ، متحدہ عرب امارات، قطر اور بنگلہ دیش سمیت خطے کے 43 ممالک اس تنظیم کا حصہ ہیں جبکہ چودہ دیگر ممالک کو مبصرین کا درجہ حاصل ہے۔