ایف پی سی سی آئی کا شرح سود میں 5فیصد تک کمی کا مطالبہ

اسلام آباد (کامرس رپورٹر) صدر ایف پی سی سی آئی عاطف اکرام شیخ نے شرح سود میں 500بیسس پوائنٹس (5فیصد) کمی کرنے کا مطالبہ کرتے ہوئے کہا ہے کہ شرح سود میں کمی برآمدات میں اضافے اور نئی سرمایہ کاری کی حوصلہ افزائی کریگی۔ اپنے بیان میں انہوں نے کہا کہ بلند شرح سود معاشی ترقی میں بڑی رکاوٹ، بڑی نوعیت کی فوری کمی کی ضرورت ہے۔ گزشتہ اجلاسوں میں پالیسی ریٹ بتدریج کم کر کے ساڑھے 17 فیصد پر لانا خوش آئند ہے، مہنگائی میں کمی اور سنگل ڈیجٹ میں آنے پر پالیسی ریٹ کو جارحانہ انداز میں کم کرنا چاہئے۔ عاطف اکرام شیخ نے کہا کہ صنعتیں عالمی منڈیوں میں مسابقتی برتری برقرار رکھنے کے لئے جدوجہد کر رہی ہیں۔ سخت مانیٹری پالیسی غیر متوازن قرضوں کا ماحول پیدا کر رہی جو طویل مدتی ترقی کو متاثر کر سکتی ہے۔ مرکزی بینک مانیٹری پالیسی اجلاس میں شرح سود کو کم از کم 5فیصد تک کم کرے۔ انہوں نے کہا کہ معاشی بحالی اور روزگار کے مواقع پیدا کرنے کے لئے شرح سود میں نمایاں کمی ضروری ہے، شرح سود میں کمی سے ایس ایم ایز کے ساتھ ساتھ بڑی صنعتوں کو بھی مدد ملے گی۔