پاکستان:اکتوبر میں48دہشتگردی کے واقعات ہوئے ، رپورٹ

لاہور( این این آئی)پاک انسٹی ٹیوٹ فار پیس اسٹڈیز کی اکتوبر2024کی ماہانہ سیکورٹی رپورٹ کے مطابق ملک بھر میں ہونے والے48حملوں میں سے زیادہ تر خیبر پختونخوا ہ اور بلوچستان میں ہوئے، جہاں بالترتیب35اور9واقعات پیش آئے۔رپورٹ کے مطابق سندھ اور پنجاب میں دہشتگردی کے محدود لیکن اہم واقعات رہنما ہوئے، دونوں صوبوں میں 2،2حملے ہوئے ۔سیکورٹی فورسز کے ہاتھوں چاروں صوبوں کے 15اضلاع میں 84عسکریت پسندوں کی ہلاکت کی اطلاعات ہیں ۔اکتوبر 2024میں ملک میں کل 48دہشتگرد حملے ہوئے، ان حملوں کے نتیجے میں 100افراد جاں بحق ہوئے جن میں 52سیکورٹی اہلکار، 36عام شہری اور 12عسکریت پسند شامل ہیں۔خیبرپختونخوا ہ میں ریکارڈ کئےگئے 35حملوں میں بنوں، کرم، ڈیرہ اسماعیل خان، شمالی وزیرستان، اورکزئی میں متعدد بڑے واقعات شامل ہیں جن کے نتیجے میں 64افراد جاں بحق ہوئے، ان میں 49سیکورٹی اہلکار اور 40زخمی ہوئے۔بلوچستان میں اکتوبر 2024کے دوران دہشتگردی کے 9 واقعات پیش آئے جن کے نتیجے میں 30افراد جاں بحق ہوئے، اس سے پچھلے ماہ 19واقعات رپورٹ ہوئے تھے۔تاہم ان میں سے زیادہ تر اموات ڈوکی میں ایک ہی حملے کے نتیجے میں ہوئیں جس میں 21کان کن جاں بحق ہوئے تھے۔